Halin sa tamatis

Gradwasyon. Napuno ang St. Francis College Gym karong hapona dinhi sa lungsod sa Balamban. Daghang estudyante sa maong eskuylahan ang buot mosaksi sa gradwasyon. Diha sab ang mga ginikanan sa mga mogradwar.Apan masulub-on si Justin bisan sa nakab-ot niyang pasidungog isip Summa Cum Laude sa kursong B.S. Accountancy.

Gisul-ob ni Justin ang iyang ‘shades’ aron matago ang luha nga nabiaw sa iyang mga mata. Nakita niya ang mga ginikanan sa mga kauban niyang mogradwar nga malipayong mitupad nila. Misakit ang dughan ni Justin nga nagtan-aw sa bakanting lingkuranan alang sa iyang ginikanan. Ug nahinumdom siya sa nahitabo lima ka tuig na ang nakalabay.

“Ang gibuhat nimo, Justin, dili nako mapasaylo! Busa layas dinhi sa atong panimalay aron dili ka nako mahinaykan!” hingilin sa iyang amahan nga hilabihang laguta nga nagtan-aw kaniya.

Grabe ang kasuko nga napatik didto sa utok ni Danny sa iyang anak. Gisugo niya si Justin sa pagbaligya sa giani niyang tamatis ngadto sa suki niya sa merkado sa Quiot. Iyang gamiton ang halin sa tamatis alang sa tigbakay sa sunod adlaw nga himuon sa Sityo Banika. Apan dako ang naiban sa kuwarta nga halin sa tamatis, hinungdan sa kasuko ni Danny sa iyang anak. Wala niya paminawa ang katarungan sa iyang anak.

Mibiya si Justin sa ilang pa-

nimalay bawon ang dakong kahiubos. Nag-abang siyag balay dinhi sa barangay Baliwagan nga gipanag-iya sa iyang uyab nga si Valerie. Gikaguol sa magtiayon ang pagkahanaw ni Justin sulod na sa lima na ka tuig.

“Kagamay sa sala nga nabuhat sa imong anak, imo dayong hinginlan,” mahay ni Shirley, asawa ni Danny, nga maghilak.

“Pasayloa ko, Day Shirley. Nagmahay bitaw ko sa akong nabuhat,” ni Danny.

Pinangga nilang Danny ug Shirley ang bugtong nilang anak nga si Justin. Problema nila karon kon asa nila makita ilang anak. Karon nga panahon sa gradwasyon ilang nahandom ilang anak.

“Dan, kon wa pa unta nimo gamita imong kabangis, makita unta nato atong anak nga makatapos sa iyang kursong gipangandoy,” matod ni Shirley.

“Way kabutangan sa akong pagmahay, Day Shirley,” ni Danny.

Sama sa naandan nanimba ang magtiayong Danny ug Shirley sa Cebu Cathedral. Human sa misa nagdali silang namauli sakay sa taksi. Dihang nasayran sa drayber nga sa Mayupay sila manaog may gisulti kini kanila.

“Ang amo nako, Sir, gikan sa Mayupay. Hawod kaayong bataa. Mogradwar siya ugmang adlawa sa St. Francis College sa Balamban. Bag-ong nahuman ang nindot niyang balay nga gipatukod. Magminyo siya human sa gradwasyon. Justin Gaurino iyang ngan,” matod sa drayber.

“Adto ta sa Balamban ugma, Dong, human sa paniudto,” ni Danny nga malipayon.

Malipayon silang magtiayon nga mibiyahe padulong sa Balamban. Wa nila pahibaw-a ang drayber nga anak nila si Justin. Igo lang silang nahiabot sa gilingkuran ni Justin, gitawag ang ngalan ni Justin isip Summa Cum Laude. Mikuyog sila sa pagpaso ni Justin padulong sa entablado aron pagtaod sa ribon ug medalya nga naangkon ni Justin.

“Pa, Ma, salamat kaayo nga mitambong mo sa akong gradwasyon,” ni Justin nga malipayon.

“Nakasakay mi si Papa nimo gahapon sa imong drayber gikan sa Cathedral ug iyang gisugid ang tanan. Maayo tawonm Dong Justin, nga nagpadayon ka sa imong pag-eskuyla ug nakapatukod pag balay,” ni Shirley.

“Ako untang pasabton si Papa nga mipalit kog esnak niadtong higayona ug nadani ko sa 170 Milyon nga premyo sa Lotto, mao nga namasin kog palit. Apan wa ko niya paminawa ug iya kong gipalayas. Nagpasalamat ko sa halin sa tamatis kay midaog ko sa lotto,”(KATAPUSAN).