BEER INILOG BISA'G UNSA'Y MAKONTRA
Bisan kinsa’y ilang makontra, ang San Miguel Beermen gikonsiderar nga puwerte ka inilog sa umaabot nga championship series sa Philippine Basketball Association (PBA) Philippine Cup.
Ang Beermen, nga yanong ningdispatsar sa Brgy. Ginebra Gin Kings, 4-1, sa ilang semi-finals series, naghuwat na lang sa modaog sa laing semis series tali sa Magnolia Ang Pambansang Manok Hotshots ug NLEX Road Warriors.
Padayon pang nagsangka kagabii ang Hotshots ug Road Warriors sa Game 6 sa ilang kaugalingong semis series diin naglabaw ang Hotshots, 3-2, ning pagsuwat.
Anaa gihapon sa Beermen ang kinauyokan sa ilang puwersa nga nagpahimo kanilang three-time Philippine Cup defending champions.
Sa pagpangulo nila ni JuneMar Fajardo, Arwind Santos, Alex Cabagnot, Marcio Lassiter ug Chris Ross, ang Beermen nakalangkat og lima ka mga titulo gikan niadtong 2015.
Gawas sa ilang tulo ka sunodsunod nga Philippine Cup titles, ang Beermen minglangkat sab sa 2015 Governors Cup ug 2017 Commissioner’s Cup.
Apan alang sa Beermen, dili sayon ang tanan nilang maagian sa umaabot nga finals.
“Yung magiging kalaban hindi basta mag-roll over. Kailangan namin kuhanin ang gusto namin ma-achieve,” matod ni Fajardo, kinsa produkto sa University of Cebu (UC) Webmasters sa interbyu sa PBA.PH.
Nidugang ang lumad nga taga lungsod sa Pinamungajan, Cebu nga kinahanglang mapahimuslan nila ang ilang taastaas nga pahuway aron mas dako ang poruhan nilang maka-fourpeat sa Philippine Cup.
“Kailangan namin ihanda ang sarili namin at maging handa. Hindi ibinibigay ang opportunity na ito sa lahat. Meron kaming ganitong opportunity at tratrabahuhin namin para makuha ito,” dugang sa 6”10 nga higante.
Gipasabot ni Santos nga kinahanglang dili molugak ang ilang bakus ug padayon silang mokombati og insakto alang sa ilang gitinguhang kasaysayan.
“Hindi mo masasabi kung hanggang saan ang itatagal ng career mo. May tsansa kami gumawa ng history, magandang huwag sayangin at pagtrabahuhan ng sama-sama,” batbat ni Santos.
Ang Beermen ni coach Leo Austria nagtinguha nga mahimong ikaduhang team nga makalangkat og upat ka sunodsunod nga kampiyunato sa samang komperensiya sunod sa Alaska Aces nga mao ang naghari sa Governor’s Cup gikan niadtong 2014 hangtod 2017.
Kon buopt hunahunaon, ang paglangkat sa Beermen og tulo ka sunodsunod nga mga titulo sa mas prestihiyusong Philippine Cup usa na ka tipik sa kasaysayan.