SKO overall champ sa Davao

Nakahipos og 13 ka gold medals, upat ka mga silver ug duha ka mga bronze ang karatekas sa Mandaue City aron langkaton ang overall title sa 81st Araw ng Davao Karatedo Invitational Tournament sa Davao City ning bag-uhay lang.

Ang mga sakop sa Sports Karatedo Organization (SKO) nga nagbasi sa Barangay Subangdaku, Mandaue City ningpatigbabaw sa kapin sa 20 ka karate clubs gikan sa nagkadaiyang dapit sa nasod ubos sa paggiya ni chief instructor ug coach Shihan Jessie Paredes.

Nagkanayon si Paredes nga dili dinhi mohunong ang ilang paningkamot ug padayon silang mag-training alang sa umaabot pa nga dagkong mga kompetsiyon.

Nangulo sa grupo mao si Rose Mabelle Seares, 16, kinsa nakalabni og tulo ka gold medals sa +40 kilograms Women’s Intermediate Kata (forms) event; -52 kilograms Women’s Kumite (sparring) event; ug -47 kilograms Women’s Kumite event.

Nakaangkon sab si Seares og bronze sa Women’s Senior Kata event.

Ang 11 anyos nga si Janine Narboada nakabira og duha ka gold medals sa -35 kilograms Women’s Advance Kata event ug -35 kilograms Women’s Kumite event.

Nakalangkat sab og duha ka gold medals si Trexie Joy Ogoc, 12, sa +35 kilograms Women’s Kumite Event ug +35 kilograms Women’s Advance Kata event.

Si Judiel Olivar, 13, nakabaton og gold sa -40 kilograms Men’s Advance Kata event ug silver sa -52 kilograms Men’s Kumite.

Ang magsuong sila si Brothers Cyryl, 15, ug John Rans Mahinay, 14, nakatabang sab aron paburoton ang medal tally sa Mandaue City.

Si Cyryl nakakuha og gold sa +40 kilograms Men’s Intermediate Kata ug silver sa -70 kilograms Men’s Kumite samtang si John Rans nakabulsa’g gold sa +40 kilograms Men’s Novice Kata ug silver sa -52 kilograms Men’s Kumite event.

Ang ubang nakadaog gold mao sila si John Steve Juban, 15, sa -70 kilograms Men’s Kumite, Enso Nirel Hipulan, 12, sa -40 Men’s Intermediate Kata ug Alexis Carmeli Patalinghug, 9, sa -30 kilograms Women’s Novice Kata.

Si Juban nakabaton sab og silver sa -35 kilograms Men’s Kumite.

Samtang si Patalinghug nakadaginot sab og bronze sa -35 kilograms Women’s Kumite./