BAYOT NGA GIKULATA NAMATAY
Namatay ang bayot nga gitabangan og kulata sa mga batan-on nga nag-inom niadtong Marso 13 sa kaadlawon sa sitio Genes, Barangay Quiot sa syudad sa Sugbo.
Matod ni Barangay Kapitan Francis Espares, namatay si Noel Radaza niadtong Marso 20 sulod sa publikong ospital
Si Radaza naospital ug kritikal ang kahimtang tungod sa grabeng kadaot sa ulo.
Tungod sa kamatayon ni Radaza, usbon sa Cebu City Homicide police ang kaso nga napasaka sa mga suspek, diin dili lang frustrated murder ang kiha kon di, murder gyud.
Matod ni Espares, nahinabi niya ang kabanay ni Radaza ug, matod pa, wala na makaagwanta si Radaza sa danyos sa iyang ulo.
Unang mitahan sa iyang kaugalingon si Clifford Gimenez, 18, uban sa iyang inahan ug mihimakak nga dili siya ang nagkulata sa mahuyang.
Gitug-an ni Gimenez nga sa dihang midagan si Radaza human siya kulataha sa iyang mga kauban gigukod kini ni Alyas Jomar ug nabanda si Radaza sa sementadong paril hangtod nga nakuyapan.
Gidala si Radaza sa tambalanan nga way panimuot.
Lima ka mga pangan ang gitug-an ni Gimenez sa kapulisan: Jessie Aguilar, Brix Espinosa alyas Paulo, Jomar Redemio nga taga sitio Bogo Quiot, ug alyas Brylle.
Ang napasakaan og kasong frustrated murder mao silang Gimenez, Aguilar, Espinosa ug Redemio samtang silang Paulo ug Brylle maoy nagsilbing saksi.
Gipasabot ni SPO1 Winston Ybañez nga daghan ang mga saksi nga mitumbok nilang Gimenez, Aguilar ug Redemio nga maoy nagtabang sa pagkulata sa bayot nga si Radaza.
Nitahan na silang Aguilar ug Espinosa samtang padayon pa nga gipangita si Redemio.