Na-pressure si Aguirre?
Gumikan ba kaha kay na-pressure sa Presidente ug sa publiko, gibali ni Justice Secretary Vitaliano Aguirre II ang unang findings sa iyang panel of prosecutors nga nag-dismiss sa kasong illegal drug trafficking batok nila ni Sugboanong negosyanteng Peter Lim ug self-confessed druglord Kerwin Espinosa Jr. Kini human puwerting sukoa ni Duterte ug sa publiko gumikan sa rekomendasyon sa panel of prosecutors.
Nabulit si Aguirre og mga pagsaway sa publiko labi na sa mga netizens sa social media. Bisan man gani ang mga kaalyado sa administrasyon nga mga senador ug kongresista nakasaway usab. Dili lang si Aguirre ang naputos sa mga pagsaway kon dili apil ang Duterte administration. Daghan ang nagkanayon nga “peke” kining war on drugs sa kagamhanan kay pinili man ang dakpon ug pamatyon.
Kasagaran sa mga nadakpan gagmay ug pipitsugin nga mga drug personalities. Apan ang mga dagko sama nila ni Lim ug Espinosa, gilibre. Well, dili mabasol ang katawhan nga moluwat ning mga pagsaway kay mao man kini ang nahitabo. Daghan pa diha ang mga dagkong personalidad nga nagpadayon sa ilang illegal nga negosyo.
Unang midepensa ang naglangkob sa panel nga ilang gi-dismiss ang maong kaso gumikan sa kahuyang sa mga ebedensiya nga gisangat sa PNP-Criminal Investigation and Detection Group (CIDG). Kon dunay angay basulon mao ang kapulisan nga nag-preparar sa complaint. Bisan si PNP chief Ronald ‘Bato’ Dela Rosa mi-angkon nga huyang ang gi-submiter nga reklamo sa kapulisan. Ila daw nga nataligam-an ang pamahayag ni Kerwin atol sa Senate inquiry diin mi-angkon kini nga siya usa ka drug lord.
Unya karon kay gibali naman ni Aguirre ug masang-at na ang maong kaso sa hukmanan, entonces, aduna nay lig-on ebidensiya? Usbon na nila ang orihinal nga reklamo aron aduna nay lig-on ebedensiya. Aw, kuyaw na og ang korte maoy mo-dismiss ani. Dili na gyud hinuon mapasakaan pa og susamang kaso sila si Espinosa ug Lim kon ma-dismiss kini sa korte kay mahulog naman sa “double jeopardy”. Sinampanggoy ning kalakiha.
(bobbygnalzaro@gmail.com)