Impeachment ni Sereno mabasura?

Mao kini ang gilauman ni Supreme Court Chief Justice Maria Lourdes Sereno. Kini maoy katarungan nga buot niya nga iduso na sa Ubos Balay-Balauranan ang naaprobahan nang articles of impeachment. Apan moagi pa kini sa committee on rules nga maoy motakda kon kanus-a kini ipresentar ngadto sa plenary aron butohan sa mga kongresista. One-third lang sa mga kongresista ang gikinahanglan aron mapasaka ngadto sa Senado ang maong impeachment complaint. Ang Senado maoy mahimong impeachment tribunal diin labing minus two-thirds votes (16) maoy mohukom kon sadan ba si Sereno.

Akong hinganlan ang mga senador ug ang ilang mga partido aron sa inyong paghusgar kon mobatok o modapig ba sila kang Sereno. Ania ang 23 ka mga senador: Aquilino Pimentel III (PDP); Ralph Recto (PDP); Vicente Sotto III (NPC); Franklin Drilon (LP); Sonny Angara (LDP); Bam Aquino (LP); Nancy Binay (UNA); Francis Escudero (Independent); Gregorio Honasan (UNA); Grace Poe (Independent); Antonio Trillanes IV (Independent); Cynthia Villar (NP); Joel Villanueva (LP); Panfilo Lacson (Independent); Richard Gordon (Independent); Juan Miguel Zubiri (PDP); Manny Pacquiao (PDP); Francis Pangilinan (LP); Risa Hontiveros (Akbayan); Win Gatchalian (NPC); Loren Legarda (NPC); Joseph Victor “JV” Ejercito (PMP); ug Leila de Lima (LP). Ang ika-24 mao unta si Allan Peter Cayetano nga karon mao ang foreign affairs secretary.

Angay masayran nga kining makombikto nga opisyal sa impeachment wala magkonbikto kaniya isip usa ka kriminal. Igo lang kining motangtang kaniya sa iyang gihuptan nga posisyon. Husto ba ang pagtuo ni CJ Sereno nga di makuha sa iyang mga kaatbang ang 16 botos aron pag-impeach kaniya?

Ang Traffic Enforcement Agency of Mandaue (Team) nagsugod pagpanakop sa mga drayber sa mga motorsiklo ug mga pasahero niini nga magsul-ob og balaclava, face mask, ug ubang mga makatabon sa nawong. Dakpon usab ang dili magsul-ob og helmet nga gimbut-an sa balaud. Ang madakpan multahan og P5, 000 o pagka-priso og unom ka buwan. Makaminus man tigali kini sa mga krimen nga mahimo sa mag-riding in tandem apan kinahanglang adunay exception ang maong ordinansa niadtong mga hubakon ug adunay sakit nga kontra ang abug ug mga aso sa mga sakyanan.

Gibali-wala ni Justice Secretary Vitaliano Aguirre II ang mga resolusyon sa iyang duha ka mga prosecutors nga mibasura sa drug cases nila ni drug dealer Kerwin Espinosa, Peter Lim ug ubang mga sinumbong. Sa ato pa balik sa uno ang kaso. Ang mga sinumbong ug ang kapulisan mahimo na sa pagpresentar og mga ebedensiya alang sa kaso sa ginadiling drugas.

Mihukom si Aguirre pagbasura sa mga resolusyon human sultihi ni Presidente Duterte nga paminawon niya ang pulso sa katilingban. Di tiaw ang pagduda sa katawhan nga adunay binuang nga nahimo sa duha ka mga prosecutors.