May Cebuana gyud nga na-rayna
Apil pod mo sa nagpulaw adtong Dominggo aron lang masuta kon kinsa sa 40 ka mga maanyag ang makalangkat sa unom ka mga korona nga gitagana sa Bb. Pilipinas 2018?
Sa pagpailaila pa lang sa mga kandidata, nakamatikod na dayon ko nga tag-as ang mga edad, lahi sa nangagi nga 25 ang labing taas. Karon duna pa gani 27 ug morag 19 ang labing batan-on.
Lagmit gipahaum kini sa kausaban sa international pageants. Sa sinugdanan pa lang, klaro na ang mga dumadaug pero daghan usab ang lagmit modaug.
Nalipay ko nga nakoronahan si Eva Patalinjug isip Bb. Pilipinas-Grand International. Wa ma-zero ang Cebu.
Gawas kang Catriona Gray (Ms. Universe Philippines 2018), namatikdan dayon nako si Ma. Ahtisa Manalo (Bb. Pilipinas Int’l.) tungod kay sweet ug fresh ang iyang dagway.
Kon usa pa ko sa mga hurado dako ang akong ihatag nga grado kang Sandra Lemonon nga matinud-anon nga nitubag nga wa siyay nahibaw-an bahin sa ‘Build, build, build’ program sa kagamhanan.
Kini tungod kay di lang usa ka pangutana ang makasukod sa kautokan sa tawo. Ang mahinungdanon nga wa siya magkalat ug nga nagpabilin ang iyang poise and grace under pressure nga, alang nako, mao gyud ang hinungdan sa Q&A portion.
Gisaulog sa programa sa ABSCBN Cebu matag Dominggo nga Mag-TV Na ang ikanapulo nga kasumaran uban sa tema nga Diyes Is It! Nakigtsika ang mga hosts nga sila si Borgie Cagigas, Jonathan Cimafranca ug Reina Elena Malinao-Tan sa mga taga media ug bloggers sa gipahigayon nga presscon niadtong Martes.
Ilang gipasigarbo ang usa sa ilang malampusong proyekto: ang MagTV Na Home Make Over nga nakahatag nag walo ka mga bag-ong balay. Gitambayayongan sa Phil. Institute of Interior Designers-Cebu ug mga partners ang proyekto.
Sa ilang ikanapulo ka tuig, magpadayon gihapon ang maong proyekto. Taga asa kaha ang sunod nga malipay?
Wala ko magmahay nga nigahin og panahon pagtan-aw sa My Perfect You. Una, nakita nako nga makaarte gyud si Pia Wurtzbach.
Bisan sige na kong makakita ni Pia sukad sa unang pag-apil niyag Bb. Pilipinas hangtud nakalangkat sa korona isip Ms. Universe 2015 ug sa mga product endorsements niini, sa My Perfect You gyud ko nakaklaro sa kagwapa niini.
Hinoon, si Gerald Anderson man gyud ang bida sa mang pelikula ug nahatagan niinig hustisya ang iyang papel.Laing nakanindot sa pelikula kay di nimo matag-an ang sangputanan sa istorya. Sa wa pa makakita, kamo na lay diskobre unsa kini. Anà.