Delikado mapagan

Dear Papa Joe,

Tagua lang ko sa ngalan nga Roy, 27 years old, usa ka security guard. Ang akong suliran kabahin sa sister in law nako. Gatipon man gud ni namo sa among balay nga gamay nga giabangan pero mo share sad siya sa abang.

Ang problema kay kaning akong in-law kay barkadista. Maguwang ni siya sa akong asawa unya magdala man siya og mga barkada nga lalake sa amo ug mag suyop. Usahay pa daw maghilawas sa iyang kaubang lalake. Ang akong kahadlukan kay basin maapil sa tripping ang akong asawa ug hilabtan ni. Naa ra ba tawn koy anak nga babaye didto.

Unsa kahay angay buhaton? Ako ba kaha ni isumbong. Basin maresbakan ko sa iyang mga barkada. Palihug tambagi lang ko kay naa ra ba say higayon nga kon moingon ko nga ayaw pagdala og mga lalake, moaksyon man siya og panintal nako. Palihug tambagi ko.

ROY Roy,

Kon ako pa nimo, mas maayo nga mohawa o mobalhin mo og puy-anan before mahitabo na ang imong gikahadlokan. Pwede pa sad na ikaguba sa inyong pamilya kon madala ka sa tintal anang bayhana kay wala gani ta masayod na baylo na iyang pakighilawas niya sa mga lalake para makabisyo. Mao nga likay na lang.

Tinuod na, delikado kon naa ramo diha ug motimbre ka sa mga awtoridad, basin tuod maresbakan mo. Total ila man nang binuhatan, masakpan ra gyud na sila sa ilang bisyo kadugayan. Kay sa di mo mohawa diha, mapagan pa hinuon mo. Pwede mapagan sa pagkangan nga adik o mapagan sa engkwentro puhon. Mao na mas maayo samtang sayo ug pwede pa balhin na mo. Bahala siya asa siya puyo, total dako na siya.

PAPA JOE

(sa inyong tampo ipadala lang sa papajoesuperb@ gmail.com)