Thinking about you
Dugay gyud kong naghunahuna. Every now and then magkatinan-away mi si JIno. Kanunay siyang nagsmile, timailhan nga nalipay siya sa among panagkita ron.
“Ayaw ko balibari, Cass. Don’t worry, di ko pilian sa pagkaon.”
Morag nakatag-an si Jino sa nia sa akong hunahuna. Aw, angay lang sab siya makahibawo sa tinuod.
“Di ra ba maayo gyud ang among mga pagkaon labi nag sud-an, Jin.”
“Okay lang nako, uy, Cass. Basta kauban lang tika, kontento na ko.”
“Tinuod?”
Wa ko ikatago ang gibati kong kalipay. Naunsa na man nuon ko ani, uy? Kalit man lang nawa’a sa akong hunahuna si Rannel. Morag dunay kalit nga kausaban sa akong pagbati. Kon unsa man kini, di ko pa maseguro.
“Aw, kon gusto gyud nimo, Jin. Sige.”
Sayo ming nagmata si Papa ug Mama ug duha ko ka manghod. Pakuyugon sab sila sa akong mga ginikanan sa bukid. Pulos na naa sa hayiskol mag-eskuwela ang akong mga igsuon. Sus, sayo sab nga nahiabot si Jino. Nagdala siyag knapsack. Tingali, gisudlan sa iyang mga sinina ug unsa pa diha.
“Let’s go!” Gipahiyoman ko si Jino. Nagpahiyom sab si Papa ug Mama kang Jino. Gisultihan ko na sila bahin sa pagkuyog ni Jino. Gitug-anan ko sab sila bahin kang Jino, nga suod ko na siyang friend.
Naghabal-habal mi. Sila si Mama, Papa, ug ang duha ko ka igsuon ang nagsakay sa usa ka habal- habal, samtang kami si Jino nagsakay sa laing habal-habal. Taas na ang adlaw sa among pag-abot sa among bukid. Midiretso mi sa payag nga maoy among pahuwayan kon moanhi I sa bukid. Duna kini gamay nga sala, gamay nga balkon ug dunay kusina nga among lung-agan.
Wa ko paubana nila ni Mama ug Papa sa uma. Gipabilin ko nila sa payag aron dunay ikaestorya si Jino. Apan namugos gyud si Jino nga mokuyog siya sa uma.
“Gusto kong maeksperyens ang bukid. Pakuyoga lang ko ninyo.”
Wa nay nahimo sila si Mama ug Papa. Gipakuyog na lang nila si Jino. Mitabang sab si Jino sa mga buluhaton sa bukid. Nangibot siya sa mga sagbot nga duol sa mga tanom nga utanon. Nalingaw kong nagtan-aw niya kay bakikaw kaayo siya. Klaro nga di siya anad sa mga buhatunon sa uma.