Gradwasyon
Usa ka semana na lang sa dili pa ang adlaw sa pagtapos ni Jonas sa kolehiyo. Tugob sa kahinam ang among galamhan ni Juanito nga nagpaabot sa maong higayon. Morag amoa nang pagahilantawan ang pagpaso sa among anak sa bantawan sa Cebu Coliseum diin gitakdang ipahigayon ang ilang commencement exercises.
“Mogradwar na gayud ang atong kamanghuran, Juanito,” sulti ko sa akong kapikas. “Matapos na gyud ang atong pag-antos sa pagpangitag ikabayad sa matrikula, plete, ikapalit og libro ug ubang gamit sa pagtungha.”
“Tinuod kana, Remedios, apil na ang bawon. Makaginhawa na gyud tag luag ani,” dason sa akong bana. “Dakong dungog nato ang kalampusan ni Jonas.”
Bachelor of Science in Hotel and Restaurant Management (BSHRM) ang kurso sa among kamanghoran sa University of Cebu. Siya ray gapili ning maong kurso. Napiho namo nga makasulod dayon og trabaho si Jonas kon kini makahuman.
Mag-uuma lang ang among panginabuhi sa bukirang bahin sa Balirong, Naga City. Aduna kami gamayng luna nga gipanamnag mais, balanghoy ug kamote. Naa usab kamiy binuhing mga kabaw, baka, kanding ug manok. Ang duha ka maguwang ni Jonas, si John Remo ug Jonathan, nangaminyo na ug wala makahuman sa ilang pagtungha sa kolehiyo. Hinuon, nakasulod kinig trabaho nga igo-igo ra sab makabuhi og pamilya. Ang kamanghoran ray naningkamot pagbugtaw sa tingusbawan ug nagpabilin sa among kiliran.
Amoa gyung gipangandaman ni Juanito ang gradwasyon ni Jonas. Nagtagana gyud kamig gamayng piging sa among panimalay. Among gipangdapit ang mga kabanay ug pipila ka suod nga higala ug silingan.
Puyra buyag, maayo og pangutok si Jonas og gani kanunay man siyang ma-honor gikan sa elementary ngadto sa hayskol. Ug karon sa kolehiyo, matod sa among anak, usa kini sa mga mopaso nga Cum Laude, butang nga nakapabayaw og samot sa among garbo kang Juanito.
“Ayaw lang mo kabalaka, Nay, Tay, kay kon makatrabaho ko, tabangan gyud ta mo,” pasalig sa ulitawo. “Dili ako magdali-dali og minyo sukwahi sa akong mga maguwang. Gusto kong mobalos sa inyong kaayo ug pagpatulo og singot alang sa akong pag-eskuyla.”
“Ayaw kanag hunahunaa, anak, kay katungod namo ni Nanay mo ang pagpa-edukar kanimo o kaninyo ni John Remo ug Jonathan,” ni Juanito.
“Tinuod kana, Dong,” dason ko.“Dili kami buot ni Tatay mo nga mahisama kamo kanamo nga wala gani makatiwas sa elementarya.”
NAGDASOK ang mga tawo – mga tinun-ang mo-gradwar, mga ginikanan ug ubang kabanay ug mga tumatan-aw – sa hawanan sa Cebu Coliseum sa adlaw sa gradwasyon ni Jonas. Kay gawas ugod sa BSHRM, gidungan man usab ang gradwasyon sa ubang kurso. Gani naglisod kami pagpangitag kalingkoran.
Subay sa nalatid sa gihan-ay nga programa, gipahigayon una ang usa-ka-takna nga misa pinaagi ni Padre Isagani, ang chaplain sa tunghaan. Sa usa parte sa programa namulong ang usa ka dinapit nga opisyal-pulitiko nga usa sa mga mingdonar og medalya alang sa pinasidunggang mga estudyante. Milanog ang pagakpak dihang gitawag na ang ngalan sa maong babaye nga kaliwat og artista. Apan dihay nahinaway sa ubang gipanulti sa pulitiko kay dayag kaayo kining nangampanya kay ang maong bisita modagan pagka senador.
Sa wala pa ang pagpanghatag sa pasidungog niadtong mga honor student lakip na sa mga special award, namarog ang tanang gradwado ug ming-awit sa ilang graduation song. Pagtawag sa ngan ni Jonas namarog dayon kami si Juanito ug nanaka sa bantawan aron pagsab-ong sa medalya ngadto sa liog sa among anak kinsa angayan kaayo sa gisul-ob niining itom nga toga. Sa wala pa kami manganaog sa bantawan, nagpahulagway una kami niadtong potograper nga nag-atang sa ubos aron aduna kamiy handumanan.
(KATAPUSAN)