Cavaliers mitipi sa Raptors KING JAMES NANGHASI

Bisan pa man sa ilang kakuwang og tawo, ang Clevelana Cavaliers milampos sa ilang pagsugpo sa conference leader Toronto Raptors, 132-129, kagahapon sa National Basketball Association (NBA).

Si LeBron James mipabaha og 35 puntos ug 17 assists, lakip na ang iyang pasa ngadto ni Kevin Love alang sa 3-pointer sa himatyong segundos nga maoy nahimong likoanan sa kadaugan nga sa samang higayon nagputol sa siyam ka sunodsunod nga kadaogan sa Raptors sa mga road games niini.

Ang Cavs miduwa nga wala ang ilang lima ka rotational players ug ingon man ang headcoach nga si Tyronn Lue kinsa padayong nagpahuway gumikan sa di maayong panglawas. Gawas sa iyang mga puntos, si James wala usab makakomiter og turnover sulod sa 40 minutos ug ang iyang mga free throws sa katapusang 7.8 segundos maoy nag-iwag sa ilang dalan ngadto sa ilang makutas nga kadaugan.

“It’s a good win for us because of how depleted we are on our roster and everything that’s been going on,” matod ni James. “It’s a good win for us against a very good opponent. But I don’t need to remind anybody about what my teams are capable of doing.”

Si Kevin Love sa iyang ikaduhang pagpakita og aksiyon human makapalta og 21 ka duwa tungod sa iyang injury sa kumagko, mitapos sa duwa nga may 23 puntos ug 12 ka rebounds. Mitali usab og 22 si George Hill.

Nangulo sa Raptors si Kyle Lowry nga may 24, midugang og 21 si DeMar DeRozan.

“They’re still a top team in our conference — and in this league,” padayag ni DeRozan. “You can’t overlook them or under-look them no matter what type of changes they made.”

Sa laing duwa, way panagana nga gitangtangan sa Philadelphia Sixers ug tango ang Memphis Grizzlies, 119-105, samtang gikuniskunis usab sa Charlotte Hornets ang Brooklyn Nets, 111-105.

Gipakaging sa Miami Heat ang New York Knicks, 119-98, gipatapsingan sa New Orleans Pelicans ang Indiana Pacers, 96-92, ug gilungi-an og sungay sa Denver Nuggets ang Chicago Bulls, 135-102.

Gibuntog sa Los Angeles Clippers ang Milwaukee Bucks, 127-120 ug mirehistro na usab og laing kadaugan ang San Antonio Spurs, 98-90, nga maoy nakapasaka sa lig-on sa ilang puwesto nga makasulod sa playoffs. /

/ AP ■ D’ KING: Si LeBron James (23) sa Cleveland Cavaliers nga milusot tali- wala sa hugot nga depensa ni Serge Ibaka (9) sa Toronto Raptors sa second half sa ilang duwa kagahapon sa National Basketball Association (NBA).