KARAANG PUJ NAAY 3 YEARS PA
2021 KINAHANGLANG BAG-O NA ANG TANAN: LTFRB
Bag-o ug moderno na ang mga public utility jeepney nga magdagan sa kadalanan sa tibuok nasod apil sa Sugbo sa 2021.
Si Ahmed Cuizon, director sa Land Transportation Franchising and Regulatory Board (LTFRB) 7, nibutyag nga sa 2021 hingpit nang ilisan ang karaang mga PUJ bisan kon tulo pa ka tuig ang panuigon.
Matod niya, padayon pa sila nag-renew sa prangkisa sa mga operator sa pagkakaron kay wala pa moluwat og bagong memorandum circular ang ilang ulohan nga buhatan.
“Pero amo nang giingnan ang mga operator nga mopalit man gani mo og bag-o nga sakyanan karon mas maayo kanang moderno,” pahayag ni Cuizon sa pakighinabi sa Superbalita Cebu kagahapon.
Gihatag niya ang katin-awan kay ang PUV modernization program sa LTFRB gihimo na usab nga rason sa Pinagkaisang Samahan ng mga Tsuper at Operator Nationwide
(Piston) sa piket-rally sa mga miyembro dinhi sa Sugbo.
Si Cuizon namahayag nga bulahan ang mga sektor sa PUJ kay gawas nga paliton sa gobiyerno ang ilang karaan nga mgaPUJ units, makadawat usab sila og financial assistance nga maoy magamit alang sa pag-down og bag-o ug moderno nga unit sa PUJ.
Si Gordon Alan Joseph, chairman sa executive committee for research, program, and organizational development sa Metro Cebu Development Coordinating Board (MCDCB), nibutyag nga nabalaka ang mga sakop sa American Chamber of Commerce and Industry (Amcham) sa nagkagrabe nga kahimtang sa dagan sa trapiko sa Sugbo.
Nangayo sila og update sa pagtuon sa Japan International Cooperation Agency ( JICA). Atol sa membership meeting sa Amcham, si Dr. Tetsuji Matsujima, team leader sa study team sa JICA, nibutyag nga ang Master Plan Study ug Institutional Developmet ug Urban Transport System sa Metro Cebu kay mahuman karong tuiga. Matod ni Joseph, presidente sa Cebu Business Club, nga sakto ang gihimo sa Regional Development Council (RDC) pagkwestyon sa underpass project sa United Nations Avenue tungod kay kini moresulta sa P1.1 bilyones nga economic losses sa matag adlaw gumikan sa kahuot sa dagan sa trapiko nga mamugna niini.
Sigon ni Giovanni Rosales, chapter leader sa Piston Cebu nga may rota nga Guadalupe hangtod sa Carbon ug vice versa kun 06C, nga 60 sa ilang mga miyembro ang niapil sa rally kagahapon ug magpadayon ang ilang pagsupak sa PUJ Modernization Program sa LTFRB hangtod ilang makita nga mameligro ang ilang panginabuhian.
“Kami sa Piston, way paghunong ang among pakigbatok sa modernization program sa gobiyerno nga naghulga sa among panginabuhian,” padayag ni Rosales nga 13 ka tuig nang drayber og PUJ. /