Unsay hinungdan sa sunog sa Lapu?

Nagkadaiyang bersyon ang nitumaw nga hinungdan sa sunog sa Tamiya, Barangay Basak, Lapu-Lapu City niadtong Martes sa hapon samtang gidaghanon sa mga biktima sa sunog nisaka.

Base sa imbestigasyon sa Lapu-Lapu City Fire Department, giingong loose electrical connection nga nagsugod sa balay ni Frederico Degamo.

“Sa among pag-investigate, dili pa ma-trace unsa gyuy hinungdan. Istorya sa uban dunay mga bata nga nagduwa og posporo,” pamahayag ni Basak Barangay Kapitan Isabelito Darnayla.

Si F01 Alvin Villaban nipabahibawo nga mitala ngadto sa 270 ka mga balay ang gilamoy sa kayo ug moabot sa P600,000 ang danyos.

Samtang sa record sa barangay, niabot sa 250 ka mga pamilya nga adunay 2,200 ka individuals ang apektado.

Gipahibawo ni Darnayla nga niadtong Miyerkules sa buntag gipaubos sa state of calamity ang Tamiya, Basak ug mokabat sa P600,000 nga calamity fund ang gipagawas nga maoy gamiton sa pagpamalit og construction materials ug gamit sa panimalay alang sa mga nabiktima.

“Sa akong tan-aw makabalik pa sila (nasunogan), wa pay ni-claim anang yutaa,” pulong ni Darnayla.

Apan ang kadagkuan sa Mactan Cebu International Airport Authority (MCIAA) nga claimant sa luna nipadayaga pinaagi ni Atty. Glenn Napuli nga gikinahanglan nga mananghid una ang barangay aron sabutan sa MCIAA Board kon tugotan nga motukod og balik sa ilang mga structure ang mga biktima.

“Wa pay communication dire nako ang MCIAA. Mga Ybanez ( family) maoy owner sa yuta,” matod pa sa barangay opisyal.

Gikatakda nga kagahapon sa hapon gipabalhin ang mga evacuees gikan sa Barangay gym ngadto na sa tunghaan sa Basak Elementary School ug STEC Campus.

Si Mayor Paz Radaza sa iyang bahin nga ang mga biktima sa sunog sa Barangay Pajo, Gun-ob ug Basak adunay cash assistance nga madawat pinaagi sa City Social Welfare and Development sa higayon nga mahingpit na ang ilang profiling sa tinuoray nga mga biktima.