Kontraktor sa underpass project misumiter og traffic plan
Ang kontraktor nga motrabaho sa underpass sa dakbayan sa Mandaue nisumiter na sa ilang traffic management plan sa dakbayan.
Kini human nga gi-anunsyo sa direktor sa Department of Public Works and Highways (DPWH) 7 nga ipadayon ang pagtrabaho sa underpass sa UN Avenue.
Base sa plano, way mga rerouting nga ipatuman sa UN Avenue sanglit tukuron man daan ang service roads sa di pa ang underpass.
Sa dihang nahinabi ning mantalaan, si Glenn Antigua, ang pangulo sa Traffic Enforcement Agency of Mandaue (TEAM) nagkanayon nga gipresentar sa kontraktor nga B.M. marketing ang ilang traffic management plan ngadto sa mga opisyal sa TEAM, City Legal Office ug City Environment and Natural Resources Office niadtong Marso 14 sa Cebu Parklane Hotel sa dakbayan sa Sugbo.
Paambit ni Antigua nga sa Mandaue una gipresentar sa kontraktor ang plano sanglit ang dakbayan man ang direktang maapektuhan sa maong proyekto.
Si Engr. Nonato Paylado, hepe sa DPWH 7 Planning and Design Division, nagkanayon nga ang mga service roads sa kilid sa underpass adunay gitas-on nga 840 metros.
Tagduha ka lanes ang service roads nga magsugod sa may Flying V gasoline station hangtod sa Wilcon depot.
Matag service road dunay gilapdon nga 11.68 metros, base sa traffic management plan.
Si Antigua nagkanayon nga kon mahuman na ang service roads, sugdan dayon ang pagtrabaho sa underpass sa intersection sa UN Avenue ug dalan DM Cortes.
Sa maong paagi, ang mga sakyanan gikan sa Cansaga Bridge paingon sa Pacific Mall makaliko patuo pinaagi sa service roads.
Kon ang ilang destinasyon paingon sa Lapu-Lapu, maka U-turn sa UN Avenue ang mga sakyanan gikan sa Cansaga Bridge pinaagi sa service roads paingon sa dakbayan sa Marcelo Fernan Bridge.
Niadtong gikan sa dalan DM Cortes paingon sa Cansaga bridge o sa Norte, ang mga sakyanan kinahanglan nga mo-right turn sa UN Avenue ug mo-u-turn ubos sa second bridge gamit ang service roads.
Ang mga gikan sa dakbayan sa Lapu-Lapu makagamit sa service roads samtang nagpadayon ang underpass.
Gitataw ni Antigua nga usa lang ka diversion road ang gipresentar sa kontraktor ug ila kining gamiton kon huot ang trapiko sa DM Cortes paingon sa Fernan Bridge.
Gikan sa DM Cortes, ang mga sakyanan gikan sa A.
Soriano Avenue mahimong makaliko patuo sa G. Ouano St., dayon left turn sa R.A. Ouano St., ug molahos ngadto duol sa Wilcon building ug right turn sa UN Avenue.
Mahimo sab nga gamiton sa mga motorista ang Batiller Street paingon sa Wilcon.
“Ready ta anytime. Ato gipangandaman ang traffic management plan,” matod ni Antigua.
Dugang niya nga aduna niyay ipahigayon nga stakeholder’s meeting nga i-schedule sa DPWH aron mapresentar ang traffic management plan.