Thinking about you

Sa amo nang pagpaniudto, gipanid-an ko si Jino. Miuna sa pagpauli si Mama sa payag aron pagluto alang sa among paniudto. Utan ug buwad ang among sud-an, ug mais ang kan-on, di humay. Sila sab si Mama ug Papa morag nagpaniid kang Jino. Hilom kong nalingaw kang Jino kay kusog kaayo siyang mohigop sa sabaw sa utan. Nagkinamot lang siya pagkaon. Kusog sab siyang mikaon sa kan-ong mais, ingon man sa buwad.

Pagkahuman og kaon ni Jino, miinom dayon siyag tubig. Nakapanug-ab siya. Morag wa lang niya ang pagpanug-ab sa among atubangan. Unya mipahiyom si Jino nako. “Busoga nako, uy.” Nagkinataw-anay sila si Mama ug Papa, samtang ako igo lang mi-smile. Nasuta ko nga wa tuoy pili si Jino sa pagkaon. Unya, nagpahayay ko sa ubos sa mangga kay init ang panahon. Summer na man gud. Miduo si Jino nako. Naglingkod ko sa nag-igdal nga gamot sa mangga.

“Seguradong mawili ko dinhi sa inyo, Cass.”

Gitan-aw kog dugay ang nawong ni Jino. Wa koy nakitang pagpakaaron-ingnon sa iyang giingon.

“Mingaw dinhi, Jin. Di ka malingaw.”

“Kontento na ko nga makita ug ikaestorya tika, Cass.”

“Nganong naingon ka man ani, Jin?” Milantaw ko sa layo. Wa ko lang tuyoa nga gikulbaan ko.

“Tungod sa gugma ko nimo, Cass.”

Dugay ming nagkatinanaway si Jino. Gipamatyag ko ang pinitik sa akong kasingkasing. Nakapahiyom ko kay wa ko na mahunahuna si Rannel. Alang siya kang Sarah kay nagminahalay man gyud sila.

“Basig nakalitan ka lang, Jin, tungod sa gipakita kong kaayo nimo?”

“Di ingon ana ang akong gibati, Cass. Lahi kining pagbatia. Di na puppy love. True love na kini.”

“Di man ingon ana kadali ang pagdesisyon, Jin. Gitug-anan na tika sa gibati ko kang Rannel. Hunahunaon ko pa pag-ayo kon duna ba sab koy pagbati nimo.”

“Di man magdali ang gugma, Cass.”

Dugay gyung mibiya si Jino sa among lugar. Kanunay siyang mokuyog nako sa bukid. Motabang gyud siya sa mga buluhaton sa uma. Namatikdan ko nga naitom si Jino tungod sa kainit. Apan nasuta ko nga wa niya kini baleha.

Usa ka gabii, nga namisita si Jino nako, gitug-anan ko siya sa tinuod, nga nahigugma sab ko kaniya. (KATAPUSAN)