MGA MAGTUTUDLO GIPAHIMANGNOAN SA DEPED

Vigan City, Ilocos Sur - Dili pwede mamahimong rason nga wala makompleto pagpapirma ang clearance nga di na ihatag ang report card sa tinun-an karon nga sagad sa klase nahuman na.

Matod ni Dr. Juliet Jeruta, Department of Education 7 regional director, nga aduna sila’y memorandum niana nga dili pwede pugngan sa tunghaan nga dili ihatag ang card kay wala makabayad sa bisan unsa nga klase nga bayrunon.

Dugang ni Jeruta nga daan na sila nga nagsige og sulti niadto pang Enero nga dili pwede mamahimong rason ang clearance, bayrunon ug uban pa, nga dili ihatag ang card.

Giawhag niini ang publiko nga kon aduna’y reklamo, ipadangat kini sa Schools Division Office kon diin nasakop ang tunghaan.

Posible nga mag-atubang og disciplinary actions ang magtutudlo ug principal kon mapamatud-an kini nga sad-an.

“So that the respective schools division offices can do his disciplinary measure. It’s really a violation of policy,” si Jeruta nagkanayon.

Niadtong mga nakalabay nga tuig dihang nakadawat usab sila og reklamo, gibutyag sa direktor nga anaa’y mga nasuspenso tungod niini.

Karong tuiga, wala pa sila’y nadawat nga report nga niabot sa rehiyonal nga buhatan.

Reklamong Administratiba ang posibleng maatubang sa magtutudlo nga gireklamo niini.

Anaa karon sa Vigan City si Jeruta alang sa Palarong Pambansa 2018. /