Provincial accountant gireklamo sa Ombud

Provincial Accountant Ramon Dumayac Jr., gireklamo sa kanhi consultant sa Kapitolyo ngadto sa Office of the Ombudsman-Visayas gumikan kay giingong wala makaduso sa iyang Statement of Assets, Liabilities and Networth (SALN) gikan sa 2004 hangtod sa 2015.

Sa iyang suwat reklamo sa Deputy Ombudsman for the Visayas pinetsahan og Abril 11, 2018, si Byron Garcia, kanhi consultant on security and jail matters panahon sa administrasyon sa iyang maguwang nga si kanhi gobernador ug Kong. Gwendolyn Garcia, kini nipahibawo nga mopasaka og reklamong kriminal batok ni Dumayac.

Siya mipasaka og 11 ka counts sa kalapasan sa Section 7 sa Republic Act 3019 kun Anti-Graft and Corrupt Practices Act ug 11 counts sa kalapasan sa Section 8 sa Republic Act 6713 kun Code of Conduct and Ethical Standards for Public Officials and Employees.

Ug laing count sa kalapasan sa Section 7 sa RA 3019 ug kalapasan sa Section 8 sa RA 6713 tungod sa giingong kapakyas niini pagtug-an o material misrepresentation sa iyang aktwal ug real business interest ug financial nga koneksyon sa iyang 2016 SALN ingon man ang iyang kapakyas usab pagtugan sa iyang investment o share capital nga dili moubos sa P1 milyon sa Cebu CFI Community Cooperative, usa ka kwalipikasyon aron mahimong usa sa mga board of director.

Si Dumayac nga gikuhaan sa iyang habig, wa mohatag og dugang komento kay wa pa siya makadawat og kopya sa reklamo ni Byron.

“Wa mi mag-away ana niya, ambot unsay nasud sa iyang ulo. Ako, natinga gani ko nganong naay complaint,” pahayag sa provincial accountant.

Si Byron nipasangil nga gipagawas ni Dumayac nga wa kini interes o financial connection bisan ang tinuod gikan sa 2016 hangtod sa kasamtangan, board of director kini sa Cebu CFI Community Cooperative ug board of director usab sa Cooperative Bank of Cebu.

Laing mga kasong administratiba ang gisang-at ni Byron batok kang Dumayac tungod sa grave misconduct, abuse of authority, dishonesty, conduct unbecoming of public official and conduct prejudicial to the best interest of service.

Niadtong Marso 19, 2018, si Byron ni-request og kopya sa SALN ni Dumayac gikan sa 2004 hangtod sa 2018.

Niadtong Marso 23, 2018, si Sarah Jo Vergara, officer-incharge sa Central Records Management Office sa Visayas Ombudsman, giingong ni-certify nga 2016 SALN lang ang ilang nakit-an.

Sa pagsusi sa 2016 SALN, giingong wa gibutang ni Dumayac ang business interest o financial connections niini ug ang di moubos sa P1 milyon nga share capital o fixed deposit sa kooperatiba.