‘DRUG CLEARED BRGYS’ REKISITOS

Kapitolyo nagtinguha nga makaangkon sa ika-upat niini nga Seal of Good Local Governance (SGLG) gikan sa Department of Interior and Local Government (DILG).

Apan, usa sa mga rekisito mao ang pagtinir og drugcleared barangays nga 20% sa kinatibuk-ang ihap sa mga barangay lukop lalawigan.

Ang Probinsiya kulang pa og 23 ka mga drug-cleared barangay aron maka-comply niini.

Dakong basehanan o indikasyon ang peace and order situation sa usa ka dapit aron makaangkon og SGLG gikan sa DILG Central Office. Ubos niini, gitan-aw karon ang anti-drug program sa mga lokal nga kagamhanan.

Ang Cebu Provincial Anti-Drug Abuse Office nakadawat ug komunikasyon gikan sa DILG nga nagpahibalo nga kabahin sa ilang basehan paghatag og SGLG karong tuiga ang mga barangay nga gideklarar nga drug cleared.

Matod pa, kinahanglang 20% o 213 sa 1,066 ka mga barangay sa Probinsiya ang kinahanglang drug cleared aron dako og kahigayonan nga maangkon sa Sugbo ang ika-4 niini nga SGLG.

Apan sigun ni CPADAO Executive Director Ivy Meca, anaa pa lang karon sa 160 ang hingpit nga drug-cleared barangay sa Sugbo ug dugang 30 lang ang anaa pa sa waiting list.

Nagtuo siya nga dili gihapon kini kaabot sa requirement, ilabi na kon sugdan na ang data gathering sa DILG sa uwahing bahin sa Abril hangtud sa ikaduhang semana sa Mayo.

Gipaniguro ni Meca nga dili ipugos sa CPADAO kon dili maabot ang required nga ihap sa mga drug-cleared barangay bisan pa man usab og dili mopasar alang sa laing SGLG award ang Probinsiya sa Sugbo.