Maayo untag makit-an

Sukad gimando ni Presidente Rodrigo Duterte ang pagpasira sa isla sa Boracay tungod sa kadaghan sa mga kalapasan sa balaud sa kalikupan, duna nay mga dapit sa turismo ang naghimog lakang. Ang lokal nga kagamhanan sa Oslob, nisira sa sandbar sa isla sa Sumilon aron malimpyuhan kini sud sa usa ka semana.

Ang Department of Environment and Natural Resources (DENR) nagsusi na usab sa ubang mga dapit nga gidagsaan sa mga turista, apil na ang Lapu-Lapu City.

Sa Cebu City, Mandaue ug Lapu-Lapu, gitung-an niini ang Mactan Channel, ang dapit nga agianan sa daghang mga barko nga magdunggoan sa pantalan dinhi. Kining mao nga gamay nga bahin sa dagat, gawas nga nahugaw sa kadaghan sa mga barkong naggamit niini, mao usab kini ang sangkuanan sa pipila ka dagkong mga sapa sa Cebu City ug Mandaue.

Ang mao nga mga sapa, gawas sa dagkong mga kanal, nahimong labayanan sa mga basura ug hugaw nga mga tubig gikan sa kabalayan sa mga namuyo kilid niini, dagkong subdivisions ug mga pabrika.

Sa laktod, daghan ang tinubdan nga nakahugaw ning mao nga bahin sa dagat nga naa ra sa tugkaran sa dakbayan sa Lapu-Lapu ug Cordova.

Niining mao nga suliran, gikinahanglan ang tinud-anay nga lakang sa paglimpyo sa Mactan Channel bisan sa hinayhinay nga paagi ug paglimpyo usab sa kasapaan ug mga estero aron di na madugangan pa ang kahugaw sa Mactan Channel.

Kon di kapugngan ang padayong pagkakontaminado sa Mactan Channel, sa hinayhinay moabot kini sa mga resort sa Lapu-Lapu. Di lang kini suliran sa mao nga siyudad, kon di sa tanang mga silingang dapit niini.

Taliwa ning atensyon karon sa paglimpyo sa mga tourist spot, hinaut pang makit-an ang dugay nang suliran sa Mactan Channel.