Magtutudlo

Kadaghanan nato natawo nga may lima ka tudlo sa kamot. Sa lima, ang sunod sa kumagko gitawag gihapon og tudlo. Mao man god kini ang gamiton sa pagtudlo og direksyon o sa laing tawo o sa usa ka butang. Ang usa ka magtutudlo nagpunay og gamit sa iyang tudlo aron pagpunting sa usa ka leksyon o kamatuoran. Mao tingali kini ang rason kon nganong usa ka kumon nga larawan sa magtutudlo mao ang paggunit og usa ka taas ug nipis nga kahoy. Tungod sa kadaghan sa iyang gitudloan, nanginahanglan siya og pangtudlo nga makita sa tanan.

Daghang matang sa pagtudlong gipakita sa nabanhawng Jesucristo. Nangutana siya: “Nganong nagubot kamo ug ngano man gayod nga nagduhaduha kamo? Ang pangutana sinugdanan sa pagkat-on. Gipasinati niya sila sa reyalidad: “Tan-awa ang akong mga kamot ug ang akong mga tiil --- nga ako gayod kini; hikapa ninyo ako ug tan-awa nga ang kalag walay unod ug bukog sama sa inyong nakita nga anaa kanako”. Lahi gyod ang kasinatian sa pagkulit sa buot itudlo. Unya gipuy-an niya mismo ang reyalidad: “‘Aduna ba kamoy makaon dinhi?’ Ug ila siyang gihatagan og usa ka buok sinugba nga isda; ug gikuha niya kini, unya gikaon sa ilang atubangan.” Siya mismo ang kamatuoran nga buot niyang itudlo. Siya gayod kini. Nabanhaw siya.

Sa dihang nakatidlom na ang kamatuoran nga buot niyang itudlo kanila, gipalagman pa kini ni Jesus: “Unya giablihan niya ang ilang hunahuna aron pagsabot sa mga Binasi sa Mga Buhat 3:13-19; Salmo 4; 1 Juan 2:1-5; Lucas 24:35-48 Kasulatan; ug miingon siya kanila: ‘Mao kini ang nahisulat, nga ang Cristo mag-antus ug mabanhaw gikan sa mga minatay sa ikatulong adlaw, ug kinahanglan nga isangyaw sa iyang ngalan ang paghinulsol sa kapasayloan sa mga sala ngadto sa tanang kanasuran, sugod sa Jerusalem”. Si Jesus nga Magtutudlo “miabli sa hunahuna” sa mga disipulo. Gidugtong niya ang iyang pagkabanhaw ug ang nahisulat sa Karaang Kasabutan. Nahimong “saksi” ang mga disipulo niining makaluwas nga kamatuoran.

Nan, diha sa Mga Buhat dili gyod mapugngan ang pagsangyaw ni Pedro mahitungod kang Jesus: “Ang manunulat sa kinabuhi gipatay ninyo, apan gibanhaw siya sa Dios gikan sa kamatayon; kami mga saksi niini.” Unya gitawag ni Pedro ang iyang mga tigpaminaw nga maghinulsol aron mapasaylo ang ilang mga sala. Gipalagman pa kini sa unang sulat ni Juan: “Kon si bisan kinsa kaninyo makasala, aduna kitay Manlalaban uban sa Amahan, si Jesucristo ang matarong nga tawo”.

Si Jesus diay ang atong unang Manlalaban. Gimatuod niya kini pinaagi sa pagtudlo. Gipadayon ang iyang papel sa Espiritu Santo nga gihatag kanato panahon sa atong bunyag. Hangtod karon, ginatudloan kita ni Jesus diha sa atong mga pangutana ug pangandoy nga tubagon niya pinaagi sa atong kasinatian, pag-ampo, pagsaulog sa mga sakramento, ug uban pa. Diha sa pagbasa sa bibliya sulod sa sabakan sa Simbahan, mapalagman nato ang atong katin-awan ug kalipay.