Love is not enough
Mawala ang bation kong hilom nga kaguol kon moparayeg nako sila si Myra ug Marlene. Pinangga ko nila, ug gimahal ko sab sila. Para nako, ang magsuon maoy makapawala sa bation kong kalaay sa akong kinabuhi.
Mitarong paglingkod ang duha sa ngilit sa akong kama. Misandig ko sa headboard sa kama.
“Tiya, tug-ani mi sa tinuod. Nganong naghilak ka man gabii?”
Wa dayon ko makatingog ug makatubag kang Myra.
“Nasabtan namo ni Ate Myra, Tiya, nga naguol gyud ka kaayo kay nagbakho man ka?”
Si Marlene na sab ang akong gitan-aw. Unya miduko ko. Naghunahuna ko. Dagko na ang magsuon. Angay ko silang sultihan sa tinuod.
“Sakit ang nahitabo sa akong lovelife.” Miginhawa kog lawom nga nagsugod pagsugid sa akong kagahapon sa gugma. “Si Roland ang laki nga love gyud nako. Di siya guwapo ug labaw na nga di siya dato. Anak siyag mag-uuma. Pero ilang yuta ang ilang giuma. Kining ambisyon usahay makadaot gyud sa kinabuhi sa tawo.”
Gitan-aw kog tagsa-tagsa ang magsuon. Naghilom sila, klaro nga naghuwat sila sa sumpay sa akong gisaysay nila. Mikatawa ko, anang katawa nga nagdalag kapait. Kahilakon na sab ko.
“Guwapo ug dato ang akong gipangandoy nga mahimong bana. Para nako, love is not enough. Pero karon, akong nasabtan kon unsa diay ang kahulogan sa tinuod nga gugma. Yes, love is not enough pero di tungod sa ambisyon nga taas ra kaayo.”
Miyangu-yango ang magsuon. Miparayeg na sab sila nako. Mibalhin silag lingkod. Ila kong gitung-an. Unya mihigda sila sa tagsa-tagsa ko ka mga paa. Gihapuhap ko ang ilang buhok. Miluag ang naghuot kong dughan.
“Parehas ninyo, maoy tinuod nga nahigugma. Di guwapo ug dato ang inyong mga uyab pero gisugot ninyo sila kay love man ninyo. Pero don’t forget, di igo ang gugma. Gikinahanglang ani ang mga sangkap aron molig-on ug molungtad ang relasyon. Pagsinabtanay, pagpaminaway sa usag usa, ug paghatag og pasaylo kon kinsa man ang nakahimog sayop.”
Mitarong og lingkod ang magsuon.
“Mao nay gihimo namo ron ni Ate Myra, Tiya ngadto sa among uyab.”
“Bitaw, Tiya. Ug karon, inanay nang nawa’a ang pagka seluso sa akong uyab. Duna na siyay pagsalig nako ug sa iyang kaugalingon.”
Gigakos ko ang magsuon.
(TAPUSON SUNOD GULA)