Biyaheng makalagot
Makalagot kaayo ang kompaniya sa ayroplano nga akong gisakyan. Sa miaging Enero 28, 2018, mao ang adlaw nga akong ipauli sa Sugbo gikan sa Manila. Importante kaayo alang kanako ang maong adlaw kay aduna akoy taambungan nga kombensiyon sa mga magsusulat ug sa samang higayon ipanghatag usab ang mga ganti sa nakadaog nga mga salmot sa gipahigayong tigi o bangga sa sinulatay sa nagkalain-laing mga kategoriya.
Bisan sa kamahal sa tiket sa ayroplano mikuha lang gyud ko aron makatambong sa kombensiyon ug labaw sa tanan akong ikahimamat pag-usab ang gikamingawan kong mga kauban sa dagang. Talagsaon ra ang maong higayon ug dili angay pakyason, ilabi na sa usa ka magsusulat nga nagmahal ug nagmanggad sa iyang pinulongan.
Alas 6:35 sa buntag sa Enero 28 ang akong flight base sa travel itinerary nako ug gikatakdang moabot sa Mactan Cebu International Airport sa alas 7:45 sa buntag. Naghi-
wasa ang akong hunahuna sa pagpauli sa Sugbo, labi na gyud sa akong lungsod nga natawhan sa Cordova, labi na kay unom na ka buwan nga wa ako makapauli. Nahinumdom ko nga sa miaging kombensiyon sa Ludabi nga didto ipahigayon sa Iligan City, gidapit ko ni Marcelo Geocallo, apan napakyas ko pagtambong tungod sa kaapiki sa panahon, ilabi na dia na ko sa Manila.
Sayo kong mibiya sa balay. Miinom lang kog usa ka tasang kape nga giparesan kog usa ka itlog nga linaga. Alas 4:30 sa buntag didto na ko sa Ninoy Aquino International Airport terminal 4 kay naniguro lagi nga dili malaming sa grabing trapik sa Manila nga morag wa nay kasulbaran.
Human moagi sa X-ray machine ang akong bagahe mi-check in counter ko dayon. Miuliot ko sa nagpila nga mga pasahero kay mao may gihatagan og priority ang mga senior citizen.
Gitunol ko dayon ang akong travel itinerary sa maanyag nga babaye nga diha sa counter.
“Delayed ni, Sir. Ala una bayenti pa ang departure ini.”
“Unsa?” nataas ang akong tingog. “Unsa goy ala una bayenti? Duna koy tambungan nga miting sa Cebu ala una sa hapon!”
“Dunay problema ang aircraft, Sir,” matod sa maanyag.
“Mahimo bang makasakay kog laing ayroplano kay nagdali ko?” Diha nay kapikal nga akong gibati. Nagbutok-butok ang akong dughan sa kalagot.
“Dili, Sir,” tubag sa maanyag nga maoy nag-asikaso sa akong travel itinerary. “Pero duna moy libreng paniudto, Sir.”
“Mag-usab pay layog!” gidawat ko na lang ang boarding pass nga gitunol sa maanyag nga babaye kanako.
Mitipon na lang ko sa mga pasahero nga nagpaabot sab sa ilang flight. Lain-lain na sad ang destinasyon. Ug tungod sa kakuwang sa mga lingkuranan sa terminal ang mga pasahero nangyaka na lang sa sementadong lugar.
Siyam ka oras ang akong pagpinaabot una makalupad ang abyon. Makalagot kaayo, apan wala akoy nahimo. Igo na lang ko sa pagpakagot sa akong mga ngipon. Mao usab ang ubang pasahero nga ako untang ikadungan pagsakay, nagbagulbol nga nadelatar ang ilang biyahe, biyaheng makalagot.
(KATAPUSAN)