Cviraa high tech na sa Palarong Pambansa
Vigan City, Ilocos Sur – High tech na ang Central Visayas Regional Athletics Association (Cviraa) tungod kay nigamit kini og makabag-o nga teknolohiya alang sa 2018 Palarong Pambansa.
Ang Information and Communications Technology (ICT) sa Bayawan City Division sa Negros Oriental mao ang unang nigamit sa Attendance and Meal Monitoring System (AMMS) sa miaging tuig alang sa ilang delegado sa Cviraa.
Karon, aron masiguro ang seguridad sa mga atleta lakip na ang tibuok delegado, aduna kini sila’y identification card (ID) diin aduna kini’y tagsa-tagsa ka mga barcode.
Matod ni Keith Barroca, IT Staff sa Department of Education (DepEd) Bayawan City nga ang AMMS mo-monitor sa lihok sa mga atleta hilabi na kon mogawas KINI sa billeting area.
Kon mogawas sa quarter ang atleta, kinahanglan nga ipascan ang barcode sa ilang ID.
Aduna na sab monitoring system alang sa ilang pagkaon aron masubay kon pila ang atleta nga wala pa makakaon ug nakakaon na.
Gigamit kini sa Cviraa sa labing unang higayon sa Palaro aron masiguro nga luwas ang tanang sakop sa delegasyon hilabi na ang mga atleta, matod ni Salustiano Jimenez, assistant regional director sa DepEd 7.
Gawas niini, kagahapon gibutangan na sab og wifi zone ang nagkadaiyang billeting sa Cviraa delagates.
Matod ni Ricardo Ricod, ang principal sa Cabittaogan National High School, sa Sta. Catalina, Ilocos Sur nga ang provincial government sa Ilocos Sur ang nagpabutang niini aron aduna’y access sa internet ang mga delegado sa tanang billeting sa nagkadaiyang mga rehiyon nga apil sa kompetisyon.