NBA PLAYOFFS MOSUGOD NA
Magsugod na karong adlawa ang gikaintapang playoffs sa 2018 National Basketball Association (NBA) diin upat ka mga parisan sa 1st round ang magkombati.
Ang defending champions Golden State Warriors moabli sa ilang kampanya sa post season batok sa San Antonio Spurs alang sa Western Conference sa Oracle Arena sa Oakland. Gihuman sa Warriors ang regular season dala ang 58-24 nga rekord nga nagpahiluna kanila sa No.2 nga dapit sa West samtang naa sa ikapito ang Spurs bitbit ang 47-35.
Nagkaguliyang man tuod ang Warriors sa hinapos nga bahin sa regular season apan malaumon sila nga makabawi ra sila sa playoffs.
Mura’g kuli na man tuod ang poruhan nga makaposte sila og 16-1 nga rekord sa playoffs sama sa miaging tuig apan malaumon ang Warriors nga kaya pa nilang depensaan ang korona taliwala sa mga kahasol nga ilang nasinati.
“I always knew everybody on our team had a good spirit, a good energy for the game,” matod sa usa sa mga sinaligan sa Warriors nga si Kevin Durant.
“We might have lost some games and had some tough stretches but that doesn’t define everybody here as an individual player. I’m kind of positive on, optimistic on each of these guys and how we approach the game no matter what the score of some of those games. I’m glad we can kind of learn from those tough times and continue to move forward.”
Ang Warriors mokombati sa 1st round nga wala ang ilang labing sinaligang pointguard nga si two-time MVP Stephen Curry, kinsa nagpaalim pa sa iyang angol sa tiil.
Ang Spurs ningpadayag sa ilang sa kaandam sa pagpakigharong sa Warriors. “You take whatever is in front of
you and you embrace it,” matod ni Spurs coach Greg Popovich.
Sa ilang upat ka mga engkuwentro sa regular season, ang Warriors nakapabor sa Spurs, 3-1.
TRAIL BLAZERS (49-33) vs. PELICANS (48-34)
Sa laing sangka sa West, mag-abot ang No.3 Portland Trail Blazers batok No.6 sa New Orleans Pelicans.
Ang TrailBlazers ningsandig og maayo sa ilang pambatong si Damian Lillard aron dag-on ang katapusan nilang tahas sa regular season nga naghatag kanila sa Northwest Division title.
Ang Pelicans, nga gipangulohan ni Anthony Davis, taas og
moral paingon ning kombatiha gumikan kay gikan kini sa lima ka sunodsunod nga kadaugan. Sa ilang mga sangka sa regular season, ang duha ka mga kampo parehong naghupot og 2-2 nga rekord.
RAPTORS (59-23) vs. WIZARDS (43-39)
Sa Eastern Conference, magsangka ang No.1 Toronto Raptors ug No.8 Washington Wizards.
Sa labing unang higayon, ang Raptors ninghuman sa
regular season isip No.1 team sa East, nga seguradong nagpaulbo sa ilang kadasig.
Ang Wizards ningkayod og maayo sa hinapos nga bahin sa regular season aron pagkumpayot sa playoffs.
Pulos naghupot og 2-2 nga rekord ang duha ka mga kampo sa ilang mga sangka sa regular season.
76ERS (52-30) vs. HEAT (44-38)
Sa laing duwa sa East, magabot ang No 3. Philadelphia 76ers ug No.7 Miami Heat.
Dili ikalimod nga grabe ka taas ang moral sa 76ers kay gikan sila sa 16 ka sunodsunod nga kadaugan nga nagpahiluna kanila sa ilang kasamtangang posisyon.
Samtang ang Heat ningsubay og makuyaw nga mga dalan una nila nakuha ang ilang luna sa playoffs.
Ang 76ers ug Heat parehong adunay 2-2 nga rekord batok sa usa’g usa sa regular season.