Consortium nag-alayon sa katukoran sa Cebu LRT
Consortium sa lokal ug langyaw nga mga kompaniya ang nakigtambayayong karon og trabaho tali sa Department of Transportation (DOTr) alang sa katukoran sa Metro Cebu Light Rail Transit (Cebu LRT).
Si Chris Kou, representante sa consortium ug project developer, niingon ang proposal kay magtukod og gipasaka nga LRT nga dunay subway section sa central business district sa siyudad sa Sugbo.
Suma niini, ang nagsugyot sa proyekto pinangulohan ni Tjen Hian Ka, senior consultant sa consortium, nagsugod na sa proseso uban sa DOTr sa katapusang quarter sa 2017 ug kini gilauman mahuman karong tuiga.
Ang proposal nga gipresentar ngadto kang Presidente Rodrigo Duterte pinaagi sa DOTr, motukod sa Cebu LRT pinaagi sa design-finance-build-transfer ug manage project.
Ang Light Rail Transit System maoy usa sa mga gisumpakian tali ni Cebu City Mayor Tomas Osmeña ug Presidential Assistant for the Visayas Michael Dino, kay ang mayor mas gusto nga Bus Rapid Transit (BRT) system ang ipatuman dinhi sa siyudad samtang ang kalihim kay maoy nanghingusog nga LRT system ang mapatuman gikan sa habagatan hangtod amihanang Sugbo.
Ang LRT Cebu ipatuman sa duha ka phases diin way magasto ang gobiyerno sa Pilipinas niini kay matod ni Kou pundohan kini sa One Belt One Road program sa kagamhanan sa China nga gipaluyohan sa pipila ka Chinese nga mga kompaniya.
Matod niya, adunay duha ka linya ubos sa phase 1 nga mobiyahe sa Metro Cebu area nga naglakip sa Central Line ug Airport Line nga dunay taytayan nga motabok sa mainland Cebu hangtod sa Mactan Island.
“Phase 1 will also provide research, development, and technical support center for building local skills related to rail eco-system,” sumala ni Kou sa press release nga nadawat sa Superbalita Cebu kagahapon.
Si Engr. Manuel “Jam” Jamonir, business development manager sa Udenna Infrastructure Corp., namahayag ang phase 1 sa Cebu LRT nga ang tibuok Metro Cebu ang ma-cover kay ang linya magsugod sa siyudad sa Carcar hangtod sa dakbayan sa Danao ug vice versa.
Samtang ang ikaduhang phase kay mao ang commuter rail nga ipatuman magagad sa dagan sa ekonomiya, populasyon, umaabot nga panginahanglan sa transportasyon ug ubang factors.
Si Kou nipasalig nga minos lang ang pagkabalda sa dagan sa trapiko sa higayon masugdan na ang pagtukod sa proyekto.
Human makumpleto ang gikinahanglan nga mga permit ug ubang documentations karong 2018, sugdan ang konstruksyon sa proyekto sa sayong bahin sa 2019 ug mahuman sa 2022.
Si Tjen ang senior director sa SAA Architects Pte Ltd sa Singapore ug inila nga personalidad sa architectural industry sa Singapore ug China.
Ang iyang kompaniya nalambigit sa transportasyon ug integrated development projects ug nakahuman og lainlaing klase sa metro rail ug light rail projects sa mga nasod sa Asya.
Siya namahayag nga 2.8 milyones ka tawo ang makabenepisyo sa proyekto nga gipaabot molahutay sa mosunod nga 50 ka tuig uban sa kasamtangan nga road networks.