Watchlist sa eleksiyon wala pa masuta: Comelec
Bisan ug nakabuylo na ang election period subay sa barangay ug SK elections karong Mayo 14, gipadayag hinuon sa Cebu Provincial Commission on Elections (Comelec) nga di pa matumbok sa pagkakaron kon asa ang mga dapit nga posibleng malakip sa election watchlist.
Gipasabot ni Election supervisor Lionel Marco Castillano nga inig human pa sa filing sa certificate of candidacy (COC) madeterminar kon asa ang mga lugar nga init ang politika sa barangay ug posibleng moresulta sa election violence.
Gisugdan ang COC filing niadtong Sabado, Abril 14, ug kutob kini karong Biyernes, Abril 20.
Matod ni Castillano nga ang Cebu Provincial Comelec ug Provincial Joint Security Command Center igo lang unya nga morekomendar sa mga dapit nga bantayanan atol sa piniliay apan ang Regional Joint Security Command Center (RJSCC) maoy moaprobar ug mopagawas sa pinal nga lista sa mga election watchlist area.
Giklaro usab sa Comelec nga di lungsod o siyudad ang ibu- tang sa lista apan ang indibidwal nga barangay mismo diin gilantawan ang posibleng may kaguliyang sa eleksiyon.