P300K REWARD SA KASO NI IMOK IHATAG SA PRO 7

Itunol karong buntag sa mga sakop sa Team Rama ang P300,000 ngadto sa Police Regional Office (PRO) 7 atol sa ilang flag ceremony aron ihatag ngadto sa nakatudlo sa pagkasikop sa suspek sa pagpatay ni kanhi Kapitan Felicisimo “Imok” Rupinta. Si Konsehal Joel Garganera, kinsa sakop sa Team

Rama ug usa sa niamot para ang matigom ang kantidad, nibutyag nga ila nang itugyan ngadto sa buhatan ni P/ CSupt. Robert Quenery, ang director sa PRO7 ug sila na ang mag-igo sa paghatag niini ngadto sa tipster.

Ang kapulisan nisikop kang Jimmy Largo kinsa maoy gitudlo sa live-in partner ni Rupinta nga si Jocelyn Mendoza kinsa kuyog sa kanhi kapitan atol sa pagpamanhig.

Si Rupinta gipusil sa makadaghang higayon didto sa lungsod sa Liloan niadtong Nobiyembre 23 sakay sa iyang

pick-up vehicle kinsa padung nang mopauli sa ilang balay.

Usa sa mga saksi sa giingong plano nga pagpatay mao si Rolando Pacres kinsa nitudlo ngadto kang Winefredo Miro, kanhi operation chief sa Office of the City Markets nga maoy nagpapatay kang Rupinta kansang kaso giduso na sa Prosecutor’s office.

Niadtong Pebrero 9, kapin duha ka buwan human sa pagpatay ni Imok, si Pacres niduso og laing affidavit nga naglambigit kang Mayor Tomas Osmeña kinsa maoy giingong ‘boss’ ni Miro nga maoy nagsugo.

Si Miro ug Rupita adunay di maayong relasyon sa Barangay Ermita sanglit adunay ilang mga prinsipyo nga wa magkatakdo bahin sa pagdumala sa barangay.

Nagkasungi sab si Rupinta ug Osmeña sanglit ang mayor wa makauyon sa pagkolekta og P10 nga voluntary donation sa libuan ka mga vendors sa Carbon market diin iya kining gihulagway nga pamaagi sa pangurakot.

Apan si Osmeña wa mahulga sa pasangil ug niingon nga di niya mahimo ang pagpapatay sanglit sa hilom si Rupinta nipadayag nga gusto nang makig-uban kang Osmeña sa BOPK kay giingong gibiyaan na siya sa Team Rama.