CSBT giandam sa Mayo 14

Gawas sa summer season, gipangandaman sa Cebu South Bus Terminal (CSBT) ang pagdagsang na usab sa daghang pasahero sa pasilidad alang sa eleksiyon sa Mayo 14.

Sa nasayran, nagsugod na ang election period niadtong Sabado ug gani hugot na nga gipatuman sa kapulisan ang total gun ban.

Gipaabot ni CSBT operations manager Joey Herrera nga mosaka unya ang passenger traffic ug ang kita sa pasilidad panahon sa piniliay.

Matod ni Herrera nga kon basehan ang niaging mga katuigan, daghan ang manguli sa kalungsuran alang sa pagbotar.

Tungod sa nature sa piniliay sa barangay nga personal ngadto sa mga botante ug mga kandidato, gilantawan niya nga kusog unya ang sakay alang sa mga tawo nga manguli.

Sa unang tulo ka buwan karong tuiga, nikita ang terminal ug dul-an sa P16 milyones ug gipaabot ni Herrera nga mosaka kini sa 2nd quarter tungod sa summer season ug sa sakay sa eleksiyon.