Kadaugan Food Festival sa Lapu mas gipalapdan
Mga lamian nga pagkaon ang gipangdalit atol sa pag-abli sa Kadaugan Food Festival 2018 sa Mactan Shrine sa dakbayan sa LapuLapu sa miaging gabii.
Ang food festival giapilan sa 61 ka hotels ug restaurants sa dakbayan diin ang ilang stalls abli gikan sa alas sa 6:00 sa hapon ngadto sa alas 10:00 sa gabii.
Si Senador Cynthia Villar, chairperson sa komitiba sa foods and agriculture sa Senado, maoy guest speaker sa pormal nga pag-abli sa 17th Food Festival.
Si Mayor Paz Radaza nagkanayon nga ang Food Festival nagsugod ug ginagmay lang niadto apan karon mas midako ug daghang estabilisemento ang nangapil.
Ang Food Festival kabahin sa kasaulogan sa ika-497 nga Kadaugan sa Mactan, ang pagpukan ni Lapu-Lapu batok sa lider sa langyaw nga mananakop nga si Ferdinand Magellan.
Mao kini ang una ug bugtong hitabo sa kasaysayan sa nasod nga ang mga lumad nidaug sa pag-ataki sa mga abante sa kahimanan nga langyawng mananakop sa isla sa Pilipinas.