Early bird sa barangay, SK election
Dunay ginaingon sa Iningles nga “The early bird gets the worm.” Pero maayo lang lagi ni kon ikaw ang langgam, di mao ang ulod. Ang tambag alang sa mga ulod, ayaw kamog matag sayo aron di kamo makaon sa langgam.
Apan daghan gyud diay ang gustong modagan sa eleksyon sa barangay ug sa Sangguniang Kabataan (SK) karong Mayo 14. Sa pagsugod sa pagfile sa certificate of candidacy (COC) alang sa maong mga eleksyon niadtong Sabado, 121 na ang ni-file sa ilang COC sa buhatan sa Commission on Elections sa syudad sa Sugbo.
Mubo da ang panahon nga gihatag sa pag-file sa COC – gikan sa Abril 14 ngadto sa Abril 20. Ang ni-file niadtong Sabado maoy mga early bird, sayo nga ni-file pero wa magpasabot nga seguradong modaog.
Sa north district sa syudad sa Sugbo, 75 ka mga kandidato ang ni-file sa ilang COC-upat alang sa pagkabarangay kapitan, 41 alang sa pagkakonsehal sa barangay, upat alang sa SK chairperson ug 26 alang sa SK councilor.
Sa south district sa syudad sa Sugbo, 46 ang ni-file sa ilang COC – lima alang sa pagkabarangay kapitan, 35 sa pagkabarangay councilor, upat alang sa SK chairperson ug duha alang sa SK councilor.
Usa sa early birds mao si Busay Barangay Councilor Eleodoro “Yody” Sanchez, nga modagan sa pagkakapitan. Ang kapitan sa Busay, Amilo Lopez, modagan sa pagkakonsehal.
Matod pa ni Atty. Enerio Ocariza Jr., ang acting election officer sa Cebu City Comelec North District, ilang gipaabot nga daghan ang mo-file sa ilang certificate of candidacy alang sa maong eleksyon kay naghinam-hinam na ang mga kandidato alang sa eleksyon sa na-oktaba sa duha na ka higayon.
“They’re very excited that the election will push through. It’s also better to file early and avoid the rush during the last day,” matod pa ni Atty. Ocariza.
Di na ma-oktaba ang maong eleksyon, matod pa ni Senador Bam Aquino, sa iyang pakigpulong atubangan sa Cebu Newscoop General Assembly niadtong Sabado, si Aquino niingon nga samtang gi-oktaba kini sa House of Representatives, ang Senado nag-recess na ug mobalik sa sesyon sa Mayo 23.