Love is not enough
Nalipay ko sa gisulti sa magsuon. Mitarong sila paglingkod sa ngilit sa kama. Nagsandig gihapon ko sa headboard sa kama.
“So, smooth na ang inyong relationship karon?”
Gitagsa-tagsa ko pagtan-aw sila si Myra ug Marlene. Mapahiyumon kaayo sila. Nagkadungan sila pagtando.
“Importante kaayo sa usa ka relasyon, Myra, Marlene, nga dunay pagsabot sa usag usa. Ug wa gyud ko masayop. Ang pagka seluso sa inyong mga boyfriend tungod kay wa silay pagsalig sa ilang kaugalingon. Aw, ingon man gyud ani ang tawo nga mobatig insecurities. Kanunay negative ang masu’od sa hunahuna.”
Nagkatinan-away ang magsuon. Mitan-aw sila pagdugay nako. Mikalit lang sila pagseryuso.
Mikupot si Myra sa akong bukton.
“Di pa man uwahi ninyo ni Noy Roland, Tiya.”
“Bitaw, Tiya. Pero hain na man ron si Noy Roland”
Miginhawa kog lawom. Kalit sab kong miseryuso.
“Nia ra siya sa atong lugar. Nagpabiling ulitawo.”
Nag-aper ang magsuon. Nahibulong ko.
“Naunsa mo diha, Myra, Marlene? Nag-aper man gud mo?”
“Wow gyud ang gugma ni Noy Roland nimo, Tiya. Imagine, ulitawo gihapon siya hangtod karon nga mga hamtong na mong duha? It’s means, forever ang love niya nimo, Tiya.”
“Saba mo diha, uy.” Nahikatawa na lang ko. “Panggawas na mo dinhi sa kuwarto kay maligo ko.”
Nagkinataw-anay ang magsuon nga nanggawas sa akong kuwarto. Mibangon ko ug misulod sa banyo nga diha ra sab sa sulod sa akong kuwarto.
Usa ka gabii, namisita ang mga boyfriend nila ni Myra ug Marlene. Gipaila ko sa magsuon sa duha ka ulitawo. Unya gibiyaan ko sila nga malipayong nag-estorya sa sala. Nagpahayahay ko sa terrace.
Hayag ang buwan. Full moon. Nahinumdoman dayon nako nga unang namisita si Roland nako nga full moon sab niadtong gabhiona. Apan wa siya magdugay kay akong giinsulto. Akong gibiay-biay.
Namahid ko sa akong mga mata kay wa ko kapugngi ang pagtulo sa akong mga luha. “Lorena”
Kalit kong nakalingi sa akong luyo. Kusog ang pagbutuk-butok sa akong dughan. Si Roland.
Nagdala siyag pungpong sa fresh red roses.
“Gipasu’od ko dinhi sa magsuon. Flowers for you, Lorena.”
Nagkurog ang akong mga kamot nga midawat sa mga buwak. Unya, nakagakos ko kang Roland.
Parehas ming duha nga malipayon kaayo.
(KATAPUSAN)