Ang iyang hukom
Igo lang mibarag si Kid Langtad Nagao. Wala siya maunsa sa mga dabudabo sa kaatbang niyang boksidor. Hinay ra og mga kumo ang iyang kaatbang nga si Star Bruno, ang ‘defending champion’ ning ilang sangka sa mga kumo dinhi sa ibabaw sa ring. Sa hunahuna ni Kid Langtad Nagao kon iya gyung tinudon pagsuntok si Star Bruno, iyang napiho nga mosaliring kini ug matikay-ang sa kambas. Apan nagpugong siya sa iyang kaugalingon
Mibagting ang kampana sa laing natapos nga hugna sa kombati sa ring. Hambugero kaayo ang kampiyon sa timbang nga ‘welterweight.’ Nag-isa-isa kini sa iyang mga bukton nga nagpasabot nga na gyud ang modaog sa away. Mao pay pagka human sa ikatulong rawon.
Milingkod si Kid Langtad Nagao sa iyang silya. May gihunghong si Mr. Kang Kong, ang iyang manedyer, “Mao kanay buhaton mo. Kid. Pabori ang sapi aron mabuhi pa ang imong anak!”
Katunga sa usa ka milyon ka pesos ang ilang bahinon sa iyang manedyer kon magpapildi siya ning sangkaa. Dako ang iyang makita sa away ug maluwas niya ang iyang anak nga babaye nga masakiton og kasingkasing nga nagkinahanglan og oper-
asyon. Asa man siya mangita og sapi sa aspaltadong dalan sa dakbayan?
“Payit lang gyud, Dong Nagao!” Si Maricel, iyang asawa, nagdasig gihapon niya bisan og napuno kini sa tumang kaguol ug kabalaka sa kahimtang sa ilang anak. “Ang atong Diyos ray mag-igo kanato. Iyang luwason ang atong anak.”
Gamay ra ang premyo mga iyang madawat gikan sa promoter sa ilang away. Linibo ang galastohan ug bayranan sa ospital.
Unya mibagting na sab ang kampana alang sa laing sambunot ibabaw sa ring. Mitindog si Kid Langtad Nagao gikan sa iyang gilingkuran nga silya. Andam na siya kon unsay mahitabo. Hugot na ang iyang hukom.
Nagngisi si Star Bruno dihang diha na sila sa taliwa sa ring, daw yawa nga nagkatawa sa iyang atubangan. Sa iyang bahin ni Kid Langtad Nagao, nahanaw na ang iyang pangandoy nga mahimong kampiyon. Mahisama siya sa iyang amahan nga boksidor nga usa na ka inutil. Gipalabi sa iyang amahan nga mabuhi siya (Kid Langtad Nagao) gumikan sa milaygay niyang sakit. Wala na mag-boksidor ang iyang amahan sukad ‘magpapildi’ sa katapusang away niini aron may sapi nga ikabayad sa ospital sa iyang (Kid Langtad Nagao) pagka sakit.
Nagharong sila Kid Langtad Nagao ug Star Bruno ibabaw sa ring. Misuntok si Star Bruno ug naigo si Kid Langtad sa nawong, apan wala siya matandog sa iyang gibarugan. Mihunat siya sa katapusan niyang kusog ug gipabuylo ang iyang suntok sa suwang sa iyang kontra. Sa impak, natikay-ang kini ug nalup-og sa salog sa ring nga wa nay panimuot. Giiphan sa repere. Kay wa na makabangon mideklarar ang reper og ‘knockout.’
Puwerting sukoa ni Mr. Kang Kong. Gibalikas siya. Unya giisa sa repere ang iyang tuong kamot human mabasa sa ‘ring announcer’ ang desisyon sa tulo ka ‘ring judge.’ Siya na ang bag-ong kampiyon sa timbang nga ‘welterweight.’
DIDTO sa ospital ang iyang asawa misugat kaniya. Nagpahiyom kini.
“Dong Nagao, may mga kapunongan sa simbahan ug sa mga magpapatigayon sa dakbayan nga mitunol og hinabang pinansiyal sa atong anak. Nahimuot sila nimo. Ila kang gipasidunggan sa imong pagka kampiyon karon.
Mihangad si Kid Langtad Nagao sa langit ug nagpasalamat sa Ginuo!
(KATAPUSAN)