DURANT, THOMPSON NANGULO SA GSW

Bisa'g wa si Curry gilubong ang Spurs; Sixers, Pelicans ug Raptors midaog sab

Gipamatud-an sa defending champions Golden State Warriors nga kaya nilang mobarog bisan wala ang ilang pambatong pointguard nga si Stephen Curry ug ilang gipangmakmak ang San Antonio Spurs, 11392, kagahapon sa pagsugod sa ilang 1st round playoffs series sa National Basketball Association (NBA) sa Oracle Arena sa Oakland.

Gawas sa ilang opensa, ang Warriors ningpakita kon unsa ka grabe ang ilang depensa nga maoy naghatag og labad sa ulo sa Spurs sa kinatibuk-ang kombati.

Gipangulohan ni Klay Thompson ang balanseng ataki sa Warriors pinaagi sa iyang 27 puntos, nihatag og 24 puntos si Kevin Durant, nidugang og 15 puntos si JaVale McGee, niamot og 12 puntos si Draymond Green samtang nitunol og 11 puntos si Shaun Livingston.

Ang Spurs gipangulohan ni Rudy Gay pinaagi sa iyang 15 puntos samtang niamot og 14 puntos matag usa sila si LaMarcus Aldridge ug Bryn Forbes.

Ang Warriors, nga mirehistro og 16-1 nga rekord sa kinatibuk-ang playoffs sa ilang paghari sa miaging season, mipakita og puwersa nga andam modepensa sa ilang korona.

“We’re a championship ballclub. We know what it takes this time a year to win,” matod ni Green.

Sa Philadelphia, nagpakatap og 17 puntos ug 14 rebounds si Ben Simmons aron tabangan ang nagkakuyaw nga hosts 76ers sa paglampornas Miami Heat, 130-103, sa kaugalingon nilang 1st round series.

Sa Toronto, nagpakatap og 23 puntos ug 12 rebounds si Serge Ibaka aron pangulohan ang kadaugan sa Toronto Raptors batok sa Washington Wizards, 114-106, sa ilaha sab nga 1st round series.

Sa Portland, nagbangis si Anthony Davis ug nimugna kini’g 35 puntos ug 14 rebounds aron agakon ang New Orleans Pelicans sa makutas nga kadaugan, 97-95, batok sa hosts TrailBlazers.

Ang Pelicans maoy bugtong ming-asdang nga puwersa nga nakadaog batok sa host team.