ASAWA GIPATAY SA BANA
TUNGOD SA TUMANG PANGABUBHO
“If I can’t have you, no one else can.”
Mao kini ang baruganan niadtong 22 anyos nga bana nga nipatay sa iyang asawa sa pasangil nga miduwa kini sa laing team ug wa siya magmahay sa iyang nahimo.
Dul-an sa 24 oras gikan sa pagkahitabo nadakpan sa mga sakop sa City Intelligence Branch ug Police Station 5 sa Mandaue City Police Office (MCPO) si Rafael Lebradella Cuizon, nga nagtagotago sa balay sa iyang iyaan sa Sityo Lupac, Barangay Punta Engaño, Lapu-Lapu City.
Ang dinakpan wa molimod nga maoy mikutlo sa kinabuhi sa babayeng iyang gihigugma nga si Anerin Soncados Cuizon, 23, niadtong Abril 14 sayo sa buntag sa balay sa pamilya ni Anerin diin didto sab sila niipon sa Sityo Tambis, Purok Paglaum, Barangay Umapad, Mandaue City.
Saysay ni Rafael nga niadtong Sabado sa sayo sa buntag sa dihang nangutang siya og de lata nga karne norte ug itlog sa tindahan nga mao untay ilang ipamahaw, gikantiwan siya sa ilang silingan nga kaliwat sab ni Anerin nga niingon: “Okey ra diay na ron nga duhay bana?
Check-in didto, check-in diri?” Inay nga maghikay og pamahaw si Rafael, misurok ang iyang dugo sa pagkakita sa iyang misis nga nagmata na og diha ra sa ilang higdanan naghayanghayang, way daghang pangutana gihansakan gilayon niya sa kutsilyo sud sa duha ka higayon diha sa may tiyang nga bahin.
Wa makahigayon og siyagit si Anerin gawas lang sa pa-gulo sa kasakit.
Matod ni Rafael nga kanhi kawani sa Department of Social Welfare and Development (DSWD) nga ning tuiga lang kalit nabugnaw ang relasyon sa iyang asawa ngadto kaniya.
Pangangkon sa dinakpan nga giprangkahan na sab siya ni Anerin nga matod pa, na
develop (in love) siya og laing lalake nga kauban ra sab niya sa trabaho.
Adunay higayon nga gipangutana ni Rafael ang iyang misis kabahin sa mga bitbit niini nga pagkaon ug kuwarta gitubag siya nga gikan sa iyang lake.
“Nganong magbuot kuno ko, akong giingnan siya nga ‘bana gud ko nimo’. Gitubag ra man ko niya wala na kuno koy labot niya,” asoy ni Rafael nga na-insulto.
Dugang sa dinakpan nga wa siya magmahay sa iyang nabuhat ug mas tunhay ang iyang huna-huna nga nawala ang iyang asawa inay ang pagsud-ong nga ma-adto kini sa laing nilalang.
Nasayran nga ang magtiayong Cuizon nga gikasal niadtong Nobiyembre 2014 pinaagi sa Christian rites sa dihang pulos pa sila mga teenager.
Si Rafael mag-atubang og kasong parricide ug andam siyang moserbisyo sa iyang nahimong sala human wala magmahay sa iyang gihimo. /