SANDBAR SA SUMILON ISLAND BUKSAN KARON

I-regulate na sa lokal nga kagamhanan sa lungsod sa Oslob ang pagpagamit sa sandbar ug dive sites sa Sumilon Island sa pag-abli og balik sugod karong adlawa aron mapugngan ang polusyon ug pagkaguba.

Dungan niini, sirad-an sud sa tulo ka adlaw ang Tumalog Falls sa lungsod, habagatang Sugbo sugod karong adlawa aron maoy sunod malimpyohan, pahibawo ni Oslob Mayor Jose Tumulak Jr.

Sa press conference kagahapon sa Bluewater Sumilon, si Oslob Tourism Officer Elizabeth Benologa nipahibawo nga limitahan na sud sa 500 ka mga bisita ang pagpagamit sa sandbar matag adlaw sugod karong adlawa. Matod niya nga matag operator sa pumpboat limitado sa tag 100 ka bisita.

Siya nipasabot tuyo niini nga mapugngan ang pagdaghan sa mga basura ug hugaw.

Base sa pagtuon sa Provincial Tourism Office, 522 ang kapasidad sa sandbar matag adllaw.

Si Benologa nibutyag nga gilimitahan usab sa duha ngadto sa tulo ka oras ang pagbisita sa mga turista sa sandbar ug dive sites aron kini makapahuway.

Apan mahimong malugwayan ang oras kon peak seasons diin modagsa ang mga bisita, sumala ni Benologa. Samtang, ang matag pumpboat kinahanglan nga magdala og black bags nga maoy labayan sa basura sa mga bisita sa dive sites ug sandbar nga abli gikan alas 7 sa buntag hangtod sa alas 5 sa hapon. Nasabutan usab sa stakeholders nga sa matag ikatulong Miyerkules sa buwan sugod sa Mayo, sirad-an ang

sandbar ug dive sites aron malimpyohan.

Matod sa tourism officer, adunay ordinansa ang lungsod nga magpamulta sa tawo nga masakpan nga nagpasagad og labay sa basura.

Si Rodrigo Magalso, bise presidente sa Bancogon Oslob Fishermen’s Association, namahayag nga dako ang natabang s temporaryo nga pagpasira sa sandbar ug

dive sites sud sa usa ka semana kay makorihian ang mga sayop nga gibuhat sa wala pa ang mando sa mayor sa pagpasira sa maong mga lugar.

Usa sa problema nga ilang nakita mao ang pagdumili sa ubang mga turista nga mogamit sa pansayan sa pagpagawas sa ilang hugaw.

Usa lang ang pansayan duol sa sandbar nga magamit sa mga bisita nga may bayad nga P20 ug nanghinaot si Magalso nga mapun-an og dugang pansayan.

Si Enrico Monsanto, marketing and corporations manager sa Bluewater Resorts, niingon nga sila ang nagpahimo sa pansayan ug andam sila motabang sa lungsod kon unsay gikinahanglan.

Siya nidugang nga wa maapektuhi ang ilang bookings sa usa ka semana nga pagsirado sa sandbar ug divesites, gani nakatabang pa kini nga mailhan sila sa gawas sa nasod.

Ang BOFA maoy gitahasan sa munisipyo nga mobantay, manalipod ug mokolekta og entrance fee nga P50 alang sa mga turista nga mogamit sa sandbar samtang P200 kon mo-dive ug dugang P200 kon may dala nga camera.