Tomas andam moatubang sa kaso ni Imok

Andam moatubang ug wa mahadlok si Cebu City Mayor Tomas Osmeña sa paghatag sa Team Rama sa P300,000 ngadto sa Police Regional Office (PRO) 7 aron ihatag ngadto sa tipster nga niresulta sa pagkasikop sa gunman nga gipasanginlan nga nipatay kang Felicisimo “Imok” Rupinta niadtong Nobiyembre.

Si Osmeña nagkanayon nga makiangayon lang nga gitunol na sa Team Rama ang ilang reward sanglit taudtaod na kining natanggong ug iyang gihulagway nga kaniadto niingon ang oposisyon nga mohatag sila og ganti sa makatudlo sa nagpusil patay ug karon gusto na usab sila nga siya mismo ang itudlo isip mastermind.

Ang mayor nikomedya pa nga motestigo siya batok sa iyang kaugalingon kon ang Team Rama mohatag og dugang $300,000.

Sila si Vice Mayor Edgardo Labella, Konsehal Joel Garganera uban sa presensiya ni P/CSupt. Robert Quenery, director sa PRO7, nitunol sa kantidad ngadto sa duha ka tawo kinsa gipasul-ob og bonnet aron pagpanalipod sa ilang seguridad.

Ang mayor nagtuo nga ang tinuod nga mastermind sa kamatayon ni Rupinta, barangay kapitan sa Ermita, mao ang iyang live-in partner nga si Jocelyn Mendoza sanglit siya ang nahibawo ug nagkontrolar sa katigayonan sa kanhi kapitan ug di ang tinuod nga asawa.

Si Osmeña ug Winefredo Miro kinsa maoy kanhi operation head sa Office of the City Markets maoy gipasanginlan ni Rolando Pacres subay sa iyang duha ka affidavit nga giduso sa managlahing buwan ngadto sa piskal diin iyang gipangtumbok nga maoy mastermind sa pag-ambush ni Imok didto sa lungsod sa Liloan niadtong Nobiyembre 23.

Pipila ka adlaw human sa pagpatay, nasikop sa kapulisan si Jimmy Largo, kinsa gipasanginlan ni Mendoza human iya kining nailhan atol sa ambush sanglit diha siya sud sa sakyanan ni Rupinta apan wa siya maangol sa pagpamusil.

Gisikop sa kapulisan si Largo sanglit nakita siya sa CCTV sa usa ka convenient store sa Liloan sa wa pa ang panghitabo. Matod niya nga di niya mabuhat ang pagpatay kang Rupinta sanglit dako kini og natabang kaniya ug usa pa, atol sa hitabo didto siya sa Aloguinsan. Apan nabuking siya sa CCTV footage.