Tomas di mopugong kon si Ballesteros mobiya sa SFI
Di mopugong si Mayor Tomas Osmeña sa higayon nga iduso na ni Ricky Ballesteros ang iyang resignation letter isip executive director sa Sinulog Foundation Incorporated (SFI).
Kini human nipadayag si Ballesteros nga moundang na sa pagserbisyo sa SFI kansang serbisyo niabot na og 16 ka tuig ug iyang giklaro nga wa kini kalambigitan sa alegasyon sa mayor nga adunay nahitabong korapsyon sa SFI sa nakalabay nga katuigan.
“No. He (Ballesteros) said he wants to go. Im not going to stop him,” padayag ni Osmeña kinsa nidayeg sa liderato sa miaging Sinulog gumikan sa dakong kalampusan nga nahimo.
Si Ballesteros sa iyang bahin una rang nibutyag nga kaniadto pa siya gustong mobiya sa SFI apan wa siya tugoti niadto ni kanhi Mayor Michael Rama hinungdan nga nipadayon siya sa pagserbisyo.
Ang kasamtangang mayor nagkanayon hapit na mahuman ang audit sa kita sa SFI nga gidumala sa labing bantugan nga accounting firm sa nasod.
Gipahibawo ni Osmeña nga nikita og P12 milyones ang SFI sa nakalabay nga Sinulog og gika-upat og pilo ang kita sa SFI sa nangaging Sinulog nga igo lang nikita og P3 milyones.
Gipasabot ni Ballesteros nga ang kantidad nga gianunsyo ni Osmeña di pa final sanglit ila pang gikwenta ang ilang gasto human sa Pebrero 15 ug masayran ang kinatibuk-ang gasto ug limpyo nga kita sa SFI sa Marso 31.
Gipadayag ni Osmeña nga wa pa mahuman og sumada ang accounting firm nga ilang gikuha ug sa higayon nga mahuman na kini, adto na masayran ang kinatibuk-ang kita sa SFI ug masuta kon tinuod ba ang iyang alegasyon nga adunay grabeng kurapsyon nga nagpalibot sa SFI.
Si Ballesteros magpabilin nga sports commissioner sa Cebu City.