Impeachment hearing ni Sereno di madayon?
Piliay. Di na malalis nga madayon na gyud ang piliay sa barangay ug Sangguniang Kabataan (SK) sunod buwan. Ang mga barangay opisyal nga magpasubli nagsige na og suroy sa mga sitio sa ilang barangay.
Matod pa ni Konsehal Leo Saberon sa Barangay Banilad, Mandaue City nga ang ilang pundok nagsige na og pulong-pulong sa mga sitio aron pagpaminaw sa mga yangongo sa ilang mga botante.
Duna usab silay gipahigayon nga medical mission.
Mao ni nakaayo sa eleksyon malokal man o nasyonal kay dunay moabot nga kaayohan sa katawhan. Tan-awa ang dalan sa Tormis padung sa ilang Torni Frank naespalto na human sa pipila ka tuig nga gipasagdaan nga guba. Ang bahin sa dalan didto sa Hi-way 77, Talamban nga morag kawa ka dako ang libaong naespalto na sad.
Matod pa ni Sen. Bam Aquino nga angayan nga ipadayon ang piliay sa SK ug barangay bisan pa sa plano sa kamara baha nga e-oktaba ngadto sa Oktubre 2018 ang piliay aron madungan sa referendum sa bag-o nga Batakang Balaod.
Mao ni ang panahom ni Senador Aquino atol sa press conference human sa iyang pakigpung ngan nga guest speaker sa General Annual Assembly sa Cebu News Workers Multi-purpose Cooperative (Newscoop) niadtong Sabado.
Ang bag-o nga balaod, RA 1074, nga nagreporma sa SK mapatuman na karon. Matod pa ni Senador Aquino nga ilang gisakaan ang edad gikan sa 15 hangtod sa 30 anyos nga mahimo modagan pagka SK. Kaniadto ang SK kutob ra 18 anyos. Gidili sad ang pagdagan sa bata nga dunay parente nga naghupot na og posisyon sa barangay. Mao ni ang giingon nga Anti-dynasty law.
MATANGTANG? Dako ang purohan nga di madayon ang impeachment hearing ni Chief Justice Maria Lourdes Sereno sa Senado tungod sa Quo Warranto petisyon nga naa karon sa Korte Suprema. Mao ni ang pangagpas ni Sen. Bam Aquino sa akong pagkighinabi kaniya samtang nagpaabot siya sa iyang turno sa pagsulti ngan nga guest speaker sa among general assembly sa Cebu Newscoop niadtong Sabado.
Sa sunod buwan pa mobalik ang sesyon sa kongreso. Pung pa ni Senador Aquino nga andam na sila ngan nga maoy huwes unya sa paghearing sa impeachment ni Sereno. Gani, nagpasukod na silang mga senador sa ilang robe, dason pa ni Senador Aquino.
Tungod sa kasuko ni Presidente Duterte sa pasumangil ni Sereno nga iyang gipaluyohan ang quo warranto petisyon nga gipasaka ni Solicitor General Jose Callida sa Korte Suprema gimandoan ni Presidente Duterte si Speaker Alvarez nga ipadali ang impeachment. Gi-orderan sad ni Presidente si Callida nga ayohon ang iyang quo warranto petisyon batok ni Sereno.