Foolish heart
Nagdali kong misulod sa SM Consolacion kay gigutom na ko. Gitan-aw ko ang akong wrist watch, 12 noon. Gatas ra man gud ang akong giinom ganinang buntag ug wa sab ko kaesnak. Gawas pa usab, init kaayo ug gusto kong magpabugnaw sa sulod sa Mall.
Anhi ko magpalabay sa panahon sa SM kay duol ra kini sa among balay. Hapon na kong mopauli. Human sa akong pag-lunch sa Jollibee, magsuruy-suroy ko sa sulod. Mag-window shopping.
Dihang nagpadulong na ko sa Jollibee, kalit kong naigking kay gikuptan ang akong kamot. Kalit kong gibira ang akong kmot dayon kong lingi. Sus, si Eduard diay ang mikupot sa akong kamot. Ang kanahan! Dako kaayog ngisi. Gisulirapan ko siya sa mata.
“Nabuang ka na, Eduard, nga mangupot man sa akong kamot?”
“Hapit na, Renren. Hapit na ko mabuang tungod sa dako kong gugma nimo.”
“Saba diha? Dakong gugma! Pangitag laing girl, uy! Kanang motuo nimo. Kabakakon nimong dako!”
“Unsay bakakon? Di bakak ning akong love nimo, uy, Renren.”
“Unsa man diay tawag anang imong pagka two, bi? Nahigugma ka nako, unya duna kay uyab? Husto ba gud nang imo!”
“Tinuod bitaw nga duna koy uyab. Pero kaniadto ra to, uy. Nagbuwag na mi.”
“Mao nay kanunay nimong isulti nako nga nagbuwag na mo. Pero nganong di man lagi moangkon si Edna nga nagbuwag mo? Smooth gani kuno ang inyong relationship. Kanunay man gani kuno mong mag-date.”
“Si Edna ang bakakon, di ako.”
Namuwa ang nawong ni Eduard. Ambot kon unsay hinungdan, sa kauwaw ba nga ginganlan ko siyag bakakon o sa kalagot? Kinsa man say iyang gikalagotan? Ako? No way!
Wa koy tingug-tingog nga mibiya kang Eduard. Nagdali kong misulod sa Jollibee ug milinya sa counter aron pag-order sa akong pagkaon ug drinks. Ang kagwang, nagsunud-sunod gyud nako. Misulod sab siya sa Jollibee ug nagtindog sa akong luyo.
“Nganong dinhi ka man molinya, Eduard? Didto o. Kadaghang counter aning Jollibee? Nagda’a ka man lag buwisit!”
Gisingkahan ko na gyud si Eduard. Sus, igo lang mingisi ang kanahan. Wa gyuy uwaw? Bisag gikasab-an ko na, modutdot gihapon nako? Nakaingon ko sa hilom. Wa na lang ko magtingog. Kagawason ko sa Jollibee ug mobalhin og laing fast food.
(SUMPAYAN)