Kamatuoran ug pagtuo
Dunay bag-ong simbahan nga gitukod sa Canduman. Nahimutang ni sa dakong compound ni Mr. Jess Tan, sikit sa basktbolan sa Upper Canduman. Ginganlan ang simbahan og Biblical Truth Center (Church of Healing). Ang pastor niini mao si Atty. Charlie Gomez. Mi-retiro na ni siya human sa baynti ka tuig nga pagpanglaban. Nangaminyo na ang iyang duha ka anak nga babaye. Ang mga miyembro ning simbahana mao silang Delia, asawa ni Charlie, mga anak nga sila Myrna ug Maricor. ug ilang mga bana nga sila Martin ug Jessie. Ang tanang silingan nga mga baryo sa Canduman gipang-imbitar nga motambong sa unang Bible study ug fellowship.
Karon, adlawng Dominggo, sa alas diyes sa buntag hangtod sa alas dos sa hapon ang sangyaw ni Pastor Charlie. Si Mr. Jess Tan ug ang iyang asawa nga si Edna mitambong gyud, dili aron magpa-miyembro, kundili gusto lang nilang masayod kon unsay pagtulon-an nga ikadulot ining bag-ong simbahan. Gi-okupar ning simbahana ang showroom nga giabangan kaniadto sa Green Meadow Furniture Factory. May mga trayenta ka tawo ang nanambong. Naglabi ang mga silingan nga nahigala ni Charlie, kay sa wa pa niya tukora kining simbahan nag-bupete man siya dinhi bali’g tulo ka tuig.
“Ginganlan ning atong simbahan og Biblical Truth Center kay ang mga pagtulon-an nato gikan gyud sa kamatuoran nga gibatbat sa Bibliya. Ug Church of Healing kay ang tanang sakit sa atong panglawas ug sakit sa gobiyerno ug sa katilingban angay sab natong tambalan,” nagkanayon si Pastor Charlie Gomez nga nagbarog sa pulpito atubangan sa mga dumuduong.
Mihunong siya sa makaidiyot kay gipasarap niya ang iyang panan-aw sa mga tawo. Unya mipadayon siya, “Dili lang ang sakit sa lawas ang angay ayuhon, hasta pod ang kakabos, ang malaksot nga kinaiya, dautang kahimtang ug dili maayong relasyon sa usag usa kanato. Igo lang sa pagtuo ang inyong buhaton ug kamo angay nang mahibalik sa maayong kahimtang!”
“Padre… aw, Pastor Charlie, unsa may kalainan sa kamatuoran ug pagtuo?” miisa sa iyang tuong kamot si Edna ug mitindog. Pag-nobeler man lang ang iyang pag-anhi, kay gipugos man siyag paanhi sa iyang bana. Iya ganing gidala si Clark, ilang kinamaguwangang ank nga Grade One pa. Milingi si Mr. Jess Tan kaniya ug mipahiyom.
Nangawot sa iyang ulo si Pastor Charlie kay naputol ang iyang sangyaw. “Dunay onse ka bersekulo sa Bibliya nga nagmatuod nga ang Diyos makabanhaw sa mga patay. Busa kon mabanhaw man sa Diyos ang patay, segurado nga ang sakit sa tawo puwede Niyang ayuhon. Mabuhi man gani ang patay, ang masakiton pa ba kahay dili Niya maayo! Mao nay ‘kamatuoran.’ Kon motuo ta nga tinuod nang nahitabo ug mahitabo sab na kanato, mao nay ‘pagtuo’!” ni Pastor Charlie nga gitugka’g pi- pila ka lugas sa singot sa agtang.
Sumala sa nasayran ni Edna gikan ni Delia, nga sa wa pa ma-abogado si Charlie ug hapit na ma-pari nagkita sila si Delia ug nagkahigugmaay. Migawas sa seminaryo si Charlie ug nagminyo sila. Karon kay wa na siyay anak nga gastuhanan, mi-retiro sa pagpanglaban ug gipadayon ang iyang relihiyuso nga buluhaton. Kay di man ma-pari, mao nga nag-pastor. Daghan sab siya’g kliyente nga mitampo’g dakong salapi aron matukod kining iyang simbahan. Gi-rehistro gyud niya sa Securities and Exchange Commission (SEC) ang Constitution and By-Laws ning simbahana. Si Charlie mismo ang General Pastor. Ang mga namirma mao sila si Charlie ug Delia ug ang ilang mga anak ug mga umagad.
“Lisod sabton ang kamatuoran ug pagtuo nga imong gisangyaw, labi na kanamo nga wa magbasa sa Bibliya,” ni Edna
“Ah, pwede sab hatagan lang nimog ehemplo kon unsay panabot nimo sa kamatuoran ug pagtuo,” ni Charlie nga lang gihapon sa pulpito. Nanarapo siya sa iyang nawong ginamit ang panyo.
“Simple lang ang akong pagsabot, Padre...aw, Pastor,” ni Edna. “Unsa man? E-share namo ang imong panabot,” agni sa pastor nga nagpahiyom.
‘Kon moingon ko nga si Clark akong anak, mao nay kamatuoran,” ni Edna nga mihapuhap sa ulo sa bata ug mipahiyom sab. Miyango ang pastor. Hasta pod ang ubang nanambong. “Ug kon ang akong bana maoy moingon nga si Clark iyang anak, mao nay pagtuo!” “Sakto! Sakto!” matod ni Charlie. “Pakpakan nato si Sister Edna!” Namakpak ang mga tawo. Apan si Mr. Tan mibiya nga wa magtingog.
(KATAPUSAN)