Pacquiao, Roach wa pa gabuwag
Giklaro ni 8-division world champion Manny Pacquiao nga wala pa siya mibuhi og pinal nga desisyon kon iya bang kuhaon og balik o dili si Freddie Roach isip head trainer alang sa umaabot niyang away.
Gipasabot sa Pambansang Kamao sa Pilipinas nga ang mga taho nga iya nang giputol ang ilang panaglambigit ni Roach wala nagagikan sa iyang mga ngabil.
“Contrary to statements which I personally did not make that are circulating in the media, I have not made my decision who will be my head trainer for my July 14 fight with Matthysse,” tweet ni Pacquiao kagahapon nga napatik sa CNN Philippines.
Si Pacquiao nakatakdang mosuway pag-ilog sa korona ni WBA welterweight champion Argentine Lucas Matthysse karong Hulyo 14 sa Kuala Lumpur, Malaysia.
Human niya nasayran ang mga taho kabahin sa panagbuwag nila ni Pacquiao human sa 15 ka mga tuig nga panagtambayayong, si Roach nipadayag nga nasakitan siya.
“Manny and I had great run for 15 years - longer than most marriages and certainly a rarity for boxing. I wouldn’t trade any of it,” asoy pa ni Roach.
“I would be lying if I didn’t say that I wasn’t hurt that he didn’t contact me personally about his decision.”
Hinuon gipadayag ni Roach nga wala siya personal nga gisultihan ni Pacquiao kabahin niini.
Nagkanayon si Pacquiao nga iya nang gipadangat ngadto kang Roach ang iyang paghatag og katinuan kabahin sa isyu ug siya mismo ang personal nga mosulti kon unsa’y iyang desisyon sulod ning semanaha.
“When that decision is made, Freddie will be the first one to be informed and then I will advise the media,” pasabot ni Pacquiao.