NAG-WILD GIPUSIL, PATAY

PAPA, IGSUON BUOT PATYON

Usa ka 37-anyos nga lalaki nga naghuramentado napusilan sa pulis sa Barangay Tiguib, lungsod sa Argao niadtong Huwebes sa gabii.

Si Juan Banual Cambari, ulitawo, 37, gituhoan nga nalisoan sa pangisip, patay human naigo sa iyang tiyan dihang gipusil ni PO2 Howard Maynopas sa Argao Police kinsa mirespondi sa alarma.

Si Chief Insp. Jose Rovic Villarin, hepe sa Argao Police, nibutyag nga sa miaging adlaw pa nag-wild si Cambari kinsa badlungon sa ilang pamilya.

Ang amahan niini nga si Mariano maoy nangayo og abag sa Argao Police human sila gihulgang pamatyon dihang nagdala si Cambari og pinute. Si Cambari nisuway og tigbas sa iyang igsuon ug amahan.

Sa pag-abot ni PO2 Maynopas, nakita niya si Cambari diha sa gawas sa panimalay nga nagdala og pinote nga isog kaayo.

Gipangita niini ang iyang amahan kay buot niyang patyon hinungdan bga giduol sa pulis ug gibadlong.

Gimandoan nga ibutang ang pinote ug motahan nga malinawon apan dihang nakita ang iyang amahan giatake ni niya. Nakadagan si Mariano ug wa maigo.

Gipamanduan sa pulis nga ibutang ang sundang pero nasuko si Cambari ug gitigbas ang pulis. Nakalihay ang pulis sa ikatulong pagpanigbas niini.

Nakita ni Maynopas nga mamiligro na iyang kinabuhi busa gipusil niya sa tiyan si Cambari nga nakaingon sa kamatayon niini.

Si Villarin niingon nga nagwild si Cambari kay wala hatagi og kuwarta sa ginikanan.

Giingong si Cambari nailang “bad boy” nga gikahadlokan sa mga silingan ug problema kaayo sa pamilya kay manghagis kun di mahatagan sa pangayuon.

Sa miaging adlaw, gikulata ni Cambari ang iyang amhan human wala mohatag og kuwarta dihang nangayo siya.