Suspek sa duguong hitabo sa rehab sa Talisay dunay daang sakit sa pangutok

Dunay gihambin nga sakit sa pangutok sukad niadtong 2015 ang mipatay sa iyang duha ka mga kauban ug pagkaangol sa usa sud sa pribadong rehabilitation center sa Dakbayan sa Talisay niadtong Huwebes sa kaadlawon.

Si Archie Abastillas na-diagnosed nga dunay severe anxiety condition sa paghiling kaniya sa usa ka doktor sa Vicente Sotto Memorial Medical Center (VSMMC).

Giresitahan siya sa doktor og anti-depressant ug pangkatulog nga tambal.

Matod sa iyang igsuong babaye nga si Nilette A. Dezo nga wa makatiwas sa pag-inom sa iyang mga tambal si Abastillas kay maglain ang lawas niini.

Mao na nga dunay mga higayon nga kini mag-hallucinate, moreklamong sakit ang ulo ug mohilak kay daghan siya og mga problema.

Nagtuo sila nga epekto kini sa paggamit og ginadiling drugas sa iyang igsuon niadto, apan iyang giklarong dugay na nibiya si Abastillas sa bisyo.

Niadtong miaging semana ila kining gidala sa Mary’s Little Children Community sa Tabunok, dakbayan sa Talisay alang sa “prayover.”

Apan niadtong Lunes, gitawagan sila sa community aron pagpahibawo kanila nga “gisul-an” na usab sa iyang sakit si Abastillas hinungdan nga ila kining gikuha nianang adlawa.

Ila una kining gidala sa ilang balay, apan si Abastillas nanghangyo kanila nga magpadala sa rehabilitation center nga gidumala ni Ervyn Ian Enilo sa sityo Uldog. Barangay Cansojong, dakbayan sa Talisay.

Gihatod nila ang iyang igsuon sa mao nga rehabilitation center niadtong Lunes kay gustong maayo sa sakit.

Si Joseph Dezo, pag-umangkon ni Abastillas, niingon nga wa makakuha og suporta sa iyang asawa ang iyang uyoan nga ilang gituohang usa sa gikasakit niini.

Ang awtoridad nagpadayon sa ilang imbestigasyon sa maong kaso.