Libuan magpapili sa dakbayan sa Sugbo

Niabot na og dul-an 3,000 ka mga tawo kinsa gustong magpapili sa umaabot nga barangay ug SK elections ang niduso sa ilang cerficate of candidacy (COC) sa Comelec Cebu City para sa piniliay karong Mayo 14.

Si Omar Sharif Mamalinta, assistant election officer sa north district, niingon nga adunay 46 ka barangay, niabot na og 1,536 (wa pay labot ang Biyernes) ka mga individual ang gustong magpapili samtang 1,447 (hangtod kagahapon sa udto) ang habig sa south district nga gilangkuban sa 34 ka barangay.

Si Atty. Anna Fleur Gujilde, election officer sa south district, nagkanayon nga human sa pagduso sa mga gustong magpapili, ang ilang certificate of candidacy iduso usab nila ngadto sa buhatan ni Atty. Marco Castillano, Comelec election supervisor aron siya na ang moduso niini ngadto sa ilang central office.

Gipadayag ni Gujilde nga ang ilang trabaho isip mga election officer mao ang pagdawat sa mga COC iduso sa gustong magpapili ug depende na kini sa ilang main office sa pagtino sa pagka-balido sa ilang dokumento.

Apan iyang gipadayag nga sukad pa kaniadto, wala pay kandidato nga wala makadayon og lansar sa barangay ug SK election gumikan sa depekto sa ilang COC sanglit diha palang sa ilang opisina, ila na kining mabantayan.

Giawhag niya ang mga kandidato sa 80 ka barangay sa dakbayan sa dili pagpangampanya sanglit subay sa gipagawas nga balaod sa Comelec, ang pagpangampanya sugdan karong Mayo 4 hangtod 12 aron dili sila mag-atubang og sumbong hilabi kon adunay moreklamo.

Usa ka batan-on ang nifile sa iyang COC ngadto sa Comelec south district apan sa pagsusi sa mga personnel wala diay kini marehistro sa barangay.

Si Gujilde nagkanayon nga ang maong batan-on gikan sa Barangay, Punta Princesa nga gusto unta magpapili sa pagkakonsehal SK sa ilang barangay.

Usa sa requirement nga gilatid sa Comelec kinahanglan nga ang usa ka kandidato makasang-at sa iyang COC kon siya rehistrado sa barangay diin siya modagan sa eleksiyon karong Mayo.