Adik nga bana

Dear Noy Kulas,

Maayong adlaw. Tagoa lang ko sa ngan nga Nenita. Minyo na ko, Noy, pero naa ko nag work karon sa abroad. Ang akong problema mao ang akong bana nga nagbisyo sukad naa na ko sa abroad.

Wa ko makahibawo ani, pero ang akong mga anak maoy nagpahibawo nako sa bisyo sa ilang amahan. Diha pay ka usa nga ilang naabtan nga nag pot session uban sa iyang mga barkada sud sa among balay. Ang akong mga anak nangahadlok na ani.

Aron di maadto sa bisyo ang akong gipadala, ako na ning gi channel sa among eldest daughter nga mo-graduate na sa college next year. Nagsige og pangutana ang akong bana nganong wa na nako siya padad-i og kwarta, pero wa nako siya tug ani kay basin ang among mga anak mao ang iyang kasuk-an ug unsa pa unya ang buhaton.

Noy, unsa may akong buhaton aning akong bana? Naa ko sa abroad mao naglibog ko unsay akong buhaton ani niya. Please tambagi ko.

NENITA

Nit,

Bitaw, di gyud kakompyansahan nang bisyuha kay mao nay hinungdan sa pipila ka grabeng mga krimen. Duna kay rason nga mabalaka bisan ila nang amahan kay ang pot session naa gihimo sulod sa inyong balay. Di gyud na maayo.

Pakigsultihi ang pamilya sa imong bana aron makapangayo ka og tabang kay bisan tuod minyo na mo, ang iyang pamilya maoy unang madangpan kay responsibilidad sab na nila kay you are not around. Ang labing maayong duolon nimo ang iyang mga ginikanan ug suod nga igsuon.

Unya, imo usab nga estoryahan ang imong bana kalabot sa imong nahibaw-an gikan sa ubang mga tawo. Ayaw lang pangaway kay kanang tawo nga naa sa bisyo, mas mosamot na sila og gara kon imo silang awayon ug pangisgan kay matandog ang ilang ego. Sigeha lang og maymay ug lakipi og hugot nga pag-ampo aron makaamgo ug mag-usab siya.

Kon kining duha mapakyas, ang last resort mao ang pagpadakop sa imong bana pinaagi sa pagtaho sa kapulisan kabahin sa iyang bisyo. Basin pa pinaagi niini, mahadlok na siya sama sa uban nga naahat sa pag-undang tungod sa tokhang.