Foolish heart
Sa hilom, nahunahuna nako nga dako gyud tingalig gugma si Edna kang Eduard kay kanunay man niya kining gibida nako. Nahunahuna sab nako kon unsa kaha ang bation ni Edna kon makahibawo siya nga gipangulitawhan ko ni Eduard?
Seguradong masuko siya nako, ug kang Eduard.
“Dako gyud kog pagsalig kang Eduard, Renren. Almost one year na ang among relasyon pero wa gyud ko makabalita nga dunay laing girl nga iyang nagustohan.”
Nakaginhawa kog lawom. Wa gyud diay kalibotan si Edna nga hilom siyang gitraydor sa iyang boyfriend. Aw, unsa may itawag kang Eduard? Traydor siyang pagka tawo.
“Ingon gyud diay ana ang pagtan-aw nimo kang Eduard, Edna? I mean, ang iyang kamatinud-anon sa iyang love nimo?”
Hapit ko na gyud tug-ani si Edna nga nasayop siya sa pagsalig kang Eduard. Kasultihon na gyud ko nga gibinuangan lang siya ni Eduard, nga nangulitawo kini nako. Mao kini ang gusto kong mahitabo aron mohunong na si Eduard sa sigeng pangulitawo ug sunud-sunod nako. Apan sa laing bahin, nahunahuna ko sab nga magpakahilom na lang ko ug pasagdan ko ang higayon nga maoy motug-an kang Edna nga giluiban siya ni Eduard.
“Ay, oo, uy, Ren. Basta, wa gyud ko magmahay nga si Eduard ang akong love.”
Nagpangidhat si Edna nako. Nindot na sab kaayo siyag smile nako. Unya nananghid siya nga mopauli na. Nagkanta-kanta pa siya. Apan wa ko malipay sa dakong gugma ni Edna kang Eduard. Naluoy nuon ko niya. Nasuod ko na siya pag-ayo. Babaye sab ko nga mobatig kaguol ug kasakit kon binuangan og usa ka lalaki.
Kaanugon sa gugma ni Edna nga napunta sa usa ka lalaki nga duhay nawong! Hilom kong nakaingon.
Usa ana ka hapon sa Domingo nga gikan ko sa simbahan, misuroy ko sa downtown. Wa dayon ko modiretso sa pagpauli kay gigutom ko. Gusto kong mokaon og hamburger. Paboito gyud nako ning pagkaona. Mosulod na unta ko sa usa ka fast food dihang nakita ko sila si Eduard ug Edna nga diha sa sulod. Nag-atubang sila paglingkod sa lamesa nga nagsimpig sa bungbong nga bildo.
Nahibulong kaayo ko kay naghilak man si Edna. Ug si Eduard morag nagpasabot kaniya. (SUMPAYAN)