Milan gaplanong mosaka sa 112

Nangandoy si kanhi world junior flyweight champion Milan Melindo nga makabaton og laing world title sa iyang planong pagsaka og timbang.

Hinuon gipasabot sa manager ni Melindo nga si ALA Promotions president Michael Aldeguer nga dili pa pinal ang desisyon ni Melindo.

“He has not finally decided yet but he is contemplating. With Donnie (Nietes) moving up, it could be a possibility that he will be campaigning at 112,” matod ni Aldeguer sa interbyu sa Sun.Star Cebu, igsuong buhatan ning mantalaan.

Si Nietes, reigning Filipino longest world champion, mibakante sa iyang International Boxing Federation (IBF) flyweight title aron mosaka sa super flyweight.

Gipasabot ni Melindo nga makaya pa unta niyang kuhaon ang iyang kasamtangang timbang nga junior flyweight apan gusto lang niyang mosaka sa flyweight.

Apan kon si Aldeguer ang pangutan-on, gusto niyang magpabilin na lang si Melindo sa junior flyweight apan nag-agad ra siya sa desisyon sa gitawag og El Metodico.

Si Melindo nakasuway na pag-away sa flyweight niadtong 2010 diin nakarehistro siya og kadaugan batok sa kanhi world champions nga sila si Carlos Tamara, Jean Piero Perez ug Jesus Geles.

Apan human siya napakyas sa iyang world title fight batok kang World Boxing Organization (WBO) ug World Boxing Association (WBA) flyweight king Juan Francisco Estrada niadtong 2013, nakadesisyon si Melindo nga mobalik sa junior flyweight.

Ning maong timbang, naangkon ni Melindo ang iyang gipangandoy nga world title pinaagi sa 1st round knockout nga kadaugan batok Akira Yaegashi sa miaging tuig sa Japan.

Hinuon sa iyang ikaduhang title defense, nailugan siya og korona sa kababayan ni Yaegashi nga si Ryoichi Taguchi pinaagi sa unanimous decision.