ALANG SA PALARO
Honor athlete wala mopaso sa iyang high school graduation
VIGAN CITY, ILOCOS SUR Tungod kay katapusan na niyang pagsalmot sa Palarong Pambansa, nakadesisyon ang usa sa mga atleta sa Central Visayas Regional Athletic Association (CVIRAA) nga si Jhuvan Jehn Baculot nga dili mopaso sa iyang high school graduation aron mokombati sa matag tuig nga kompetisyon.
Sa interbyu sa Superbalita Cebu, nagkanayon ang 18 anyos nga atleta nga nakatakda ang ilang graduation rites sa University of Cebu (UC) niadtong Abril 8 apan wala siya mopaso gumikan kay na-conflict kini sa paglarga sa delegasyon sa CVIRAA paingon sa Vigan City.
Usa ka adlaw sa wala pa ang graduation rites sa UC, ang delegasyon sa CVIRAA kauban si Baculot milarga na paingon sa Manila dayon milahos na kini sa Vigan City alang sa ika- 28 ka mga tuig nga edisyon sa Palaro.
Hinuon bisan wala siya nakapaso, mapasigarbuon gihapon si Baculot gumikan kay mi-graduwar siya nga adunay honors.
Sulod na sab sa unom ka mga tuig nga nakaduwa sa athletics event sa Palaro si Baculot apan wala pa siya’y medalya nga naangkon. Apan bisan pa niini, wala siya mawad-i og kadasig ug tinguha niyang malabwan ang iyang personal best.
Sa iyang kampanya ning tuiga sa Palaro, nakadawat og taho si Baculot nga nagkasakit og dengue ang iyang manghod, duha ka mga adlaw sa wala pa siya mokombati.
Miluag ang pagbati ni Baculot dihang iyang nasayran nga naalim na ang iyang manghod.
Si Baculot ug ang iyang manghod nagpuyo sa ilahang lola ug nagdako sila nga wala makaila sa ilang tinuod nga inahan.
Gipasabot ni Baculot nga gikahiligan na niya ang athletics dihang nagtungha pa siya sa elementarya isip Grade 4 nga estudyante sa Cebu Institute of Technology-University.
“Sa CIT, kita ko ba nga naa’y nagdagan-dagan nga athletes mao to mura’g naganahan sad ko ug nag-apil apil ko nila,” matod ni Baculot.
Sa iyang pagpatong sa kolehiyo, plano ni Baculot nga magpadayon sa iyang gikahiligang natad sa paugnat sa kusog ug tinguha niyang makaapil sa Private Schools Athletic Association (PRISAA). /