Gubot pa sa lukot
Kon unsa kahuot ang sitwasyon ug kagubot ang dagan sa trapik sa Metro Cebu, ang pagpangita sa solusyon sa maong problema sama usab sa kagubot sa lukot. Klaro kaayong mipatibabaw ang bulok ug interes sa pulitika, lakip ang nagpahipi nga kahakog ug naglaway sa bahandi mugna sa multi-bilyunes sa proyekto. Kanta sa karaang pamulitika walay paglurang.
Unsa kining bag-ong taho? Ang Department of Transportation (DOTr) nirekomendar sa Department of Finance (DOF) sa pagkanselar sa Bus Rapid Transit (BRT) project tungod sa dili haom ang inprastraktura sa dakbayan sa Sugbo. Base sa dokumento nga nakuha sa media, si DOTr Secretary Arthur P. Tugade nisuwat kang DOF Secretary Carlos G. Dominguez bahin sa maong katuyoan uban sa pasalig nga sa publiko nga dunay laing ihulip nga ‘more superior’ sa BRT project kon ang National Economic and Development Authorty - Investment Coordination Committee (NEDA-ICC) mokompirma sa ilang awhag nga kanselasyon.
Walay gisulti kon unsay ipuli sa BRT nga giduso sa kampo ni Mayor Tomas Osmeña. Apan klaro nga ang Metro Cebu Light Rail Transit (Cebu LRT) nga gusto sa kampo ni Presidential Assistant for Visayas Michel Dino maoy iduso. Ang isyu sa BRT batok LRT sa Sugbo nagkainit apan napaklaro kini nga sitwasyon atol sa pagpahigayon sa Philippine Economic Briefing sa Marco Polo Plaza, dakbayan sa Sugbo niadtong Huwebes sa miaging semana.
Si Neda Secretary Ernesto Pernia niingon nga ang BRT maoy short-term ug long-term nga solusyon ang LRT. Natuki sa editoryal sa Superbalita pipila ka adlaw ang nakalabay nga ang BRT ug LRT dili bangga. Pwedeng dungan nga ipatuman, dili ba mas daghang solusyon, mas maayo? Magtibangay sila. Pero sa lihok sa mga opisyal sa magkaatbang nga partido, ang lukot nga daan nang gubot misamot pa og kalukot. Pastilan.