Foolish heart
Sa sinugdanan naghingus-hingos lang si Edna. Apan sa nadugay na morag nagbakho na siya. Dako gyud ang problema nila ni Edna ug Eduard sa usag usa, nakaingon ko sa akong kaugalingon.
“Gusto kong magkaestorya ta sa personal, Ren.”
“Okey. Karon ba gyud dayon?” Nakaginhawa kog lawom. Mibati kog kaluoy kang Edna.
“Oo, Ren.”
Human sa among pag-estorya ni Edna sa selpon, nag-ilis dayon ko. Nag-una sa pag-abot si Edna sa Mang Inasal. Softdrinks lang ang iyang gi-order. “Unsay imong gusto, Ren?” “Salamat na lang, Ed. Busog pa ko.” Gitan-aw ko pagayo si Edna.
Nakapanglingo ko. Nanghubag ang iyang mga mata, tingali tungod sa sige niyang paghilak.
“It’s about time nga makahibawo ka sa tinuod, Ren.”
“Tinuod? Bahin sa unsa ba na, Ed?”
Nakalitan gyud ko. Nahunahuna nako nga duna diay gitago si Edna nako.
“Ang tanan kong gisulti nimo tumu-tumo ko lang. Kadtong akong giingon nga kanunay ming nag-date si Eduard, nga gihagkan ko niya pag-ayo sa sulod sa sinehan, ug nakig-estorya siya nako sa selpon og dugay, di to tinuod. Gusto ko lang ipatuo nimo nga namakak si Eduard sa iyang gitug-an nimo nga nagbuwag na mi. Nakahibawo ko nga nangulitawo siya nimo. Maoy akong gusto nga di mo siya sugton ug masuko ka niya.”
“Ang buot mong ipasabot, Ed, nga tinuod gyud mong nagbuwag si Eduard?” Hinay nga mitando si Edna. “Sorry, Ren. Ang tinuod, nakasa’a ko kang Eduard. Nanguyab kog lain bisag boyfriend ko na siya.”
Wa ko makatingog. Mao ray akong nahimo ang pagpanglingu-lingo. Pastilan, nagsulti diay si Eduard nako sa tinuod nga nagbuwag na sila si Edna. Di diay siya bakakon nga pagka tawo.
“Sige, Ren, mao ra ni ang tuyo ko nimo. Nagbasol ko nga gilimbongan ko si Eduard. Pero di ko na makuha ang iyang pagsalig nako. Imposible na sab nga magkabalik mi.”
Dihang mibiya na si Edna nako, nahunahuna nako nga duna siyay foolish heart. Ug nahibulong ko sa akong kaugalingon kay hilom kong nalipay sa akong nahibaw-an gikan kang Edna.
Usa ka gabii, namisita si Eduard nako. Nindot ang smile ko niya. Maayo na ang akong tinagdan niya. Ug wa ko mosupak dihang mitupad siya paglingkod nako sa taas nga sopa nga akong gilingkoran. (KATAPUSAN)